ବିଦ୍ୟୁତ୍ ତାରର ବାର୍ହାଫାଶରେ ଲାଗି ମରୁଛନ୍ତି

ବନବିଭାଗର ଅବହେଳା : ହାତୀ ଟ୍ରାକର୍ ଖଟୁଛନ୍ତି ଅଧିକାରୀଙ୍କ ଘରେ  !

ବଲାଙ୍ଗୀର ବନଖଣ୍ଡର ବଲାଙ୍ଗୀର  ରେଞ୍ଜ୍ ରେ  ଗତ ୮ ତାରିଖରେ ଏକ ହାତୀର ମୃତଦେହ ଉଦ୍ଧାର ହୋଇଥିଲା । ଗତ୧୨ ତାରିଖରେ  ସେଇ ରେଞ୍ଜ୍ ରେ ପୁଣି ଏକ ହାତୀର ମୃତଦେହ ଉଦ୍ଧାର କରାଯାଇଛି । ବନ୍ୟପ୍ରାଣୀ ସୁରକ୍ଷା ସପ୍ତାହ ପାଳନ ସମୟରେ ୪ ଦିନ ଅନ୍ତରରେ ୨ ଟି ଅଣ୍ଡିରା ଦନ୍ତାହାତୀଙ୍କର ମୃତ୍ୟୁ ଚାଞ୍ଚଲ୍ଯ ସୃଷ୍ଟି କରିଛି ।

ପ୍ରଥମ ୧୮ ରୁ ୨୦ ବର୍ଷ ବୟସ୍କ ଦନ୍ତାହାତୀଟିର ଗଳିତ ମୃତଦେହକୁ ଅସୁରଡୁଙ୍ଗୁରୀ ଗାଁ’ ନିକଟସ୍ଥ ମଠଖାଇ ସଂରକ୍ଷିତ ଜଙ୍ଗଲରେ ଗତ ୮ ତାରିଖରେ ଗାଁ’ ଲୋକଙ୍କ ଠାରୁ ଖବର ପାଇ ବନବିଭାଗ ୪/ ୫ ଦିନପରେ ଠାବ କରିଥିଲା ।  ତା’ର ଗୋଟିଏ ଦାନ୍ତକୁ କାଟି ନିଆଯାଇଥିବା ଓ ଆର ଦାନ୍ତଟି ମୁହଁମାଡି ପଡିଥିବାରୁ ମାଟିରେ ପୋତିହେଇ ଯାଇଥିବାରୁ ସମ୍ଭବତଃ ବର୍ତ୍ତି ଯାଇଥିବା ଅନୁମାନ କରାଯାଉଥିଲା । ଘଟଣାସ୍ଥଳରେ ଭବାନୀପାଟଣାର ଆରପିସିସିଏଫ୍ , ବଲାଙ୍ଗୀର ଡିଏଫଓ , ଏସିଏଫ୍ , ରେଞ୍ଜର , ଫରେଷ୍ଟରଙ୍କ ସମେତ ପଶୁଡାକ୍ତର ଓ ସାଇଣ୍ଟିଫିକ୍ ଦଳ ସହ ଡଗ୍ ସ୍କ୍ବାର୍ଡ ମଧ୍ୟ ପହଞ୍ଚି ତଦନ୍ତ ପୂର୍ବକ ବ୍ୟବଚ୍ଛେଦ କରାଯାଇଥିଲା । ପ୍ରଥମେ ଏହାକୁ ବନବିଭାଗ ପକ୍ଷରୁ ଅନୌପଚାରିକ ଭାବରେ ସ୍ବାଭାବିକ୍ ମୃତ୍ୟୁ , ଇନ୍ ଫେକ୍ସନ୍ ଏବଂ ଗଣମାଧ୍ୟମରେ ହାତୀଦାନ୍ତ ମାଫିଆଙ୍କ ଦ୍ବାରା  ‘ଦାନ୍ତ ପାଇଁ ଦନ୍ତା ହତ୍ୟା ‘  ଆଦି କୁହାଯାଇଥିଲେ ହେଁ , ଶେଷରେ ଏହା  ବିଦ୍ୟୁତ୍ ତାରର ଜଙ୍ଗଲୀ ବାର୍ହାଫାଶରେ ପଡି ହାତୀଟିର ମୃତ୍ୟୁ ହୋଇଥିବା ପରବର୍ତ୍ତୀ ତଦନ୍ତରୁ ଜଣାପଡିଥିଲା । ଏହି ମାମଲାରେ ବନବିଭାଗ ଉକ୍ତ ଅସୁରଡୁଙ୍ଗୁରୀ ଗ୍ରାମର ୫ ଜଣ ଚୋରାଶିକାରୀଙ୍କୁ ଗିରଫ କରାଯାଇ ଗତକାଲି କୋର୍ଟଚାଲାଣ କରିଛି । ସେମାନେ ହେଲେ ଅନି ମାଝୀ ( ୪୫ ) , ପଦୁଁ ମାଝୀ ( ୨୦ ) , ତରଣୀ ମାଝୀ ( ୨୫ ) , ଲବ ଭୁଏ ( ୨୫ ) ଓ ସରୋଜ ବରିହା ( ୨୩ ) । ସେମାନେ କିଛିଦୂରରେ ଥିବା ଏକ ବିଦ୍ୟୁତ୍ ସବ୍ ଷ୍ଟେସନରୁ ଚୋରା ତା’ର ସଂଯୋଗ କରି ଜଙ୍ଗଲୀବାର୍ହା ଶିକାର କରିବାକୁ ଫାଶ ବସାଇଥିବା ସ୍ବୀକାର କରିଥିବା ବନବିଭାଗ ସୂତ୍ରରୁ ପ୍ରକାଶ । ତେବେ ଉକ୍ତ ମୃତହାତୀଟିର ଦୁଇଟି ଦାନ୍ତରୁ ଗୋଟିଏ ଦାନ୍ତକୁ କେହି ଟାଙ୍ଗିଆରେ ହାଣି ଚୋରି କରିନେଇଥିବା ବେଳେ , ସେ ସମ୍ପର୍କରେ ବନବିଭାଗର ତଦନ୍ତରେ ଜଣାପଡିପାରିନାହିଁ ।

ବିଡମ୍ବନାର ବିଷୟ ଯେ , ପୁଣି ପଅରିଦିନ ସେଇ ବଲାଙ୍ଗୀର ବନଖଣ୍ଡର ସୁଲିଆ ଓ ଭୀମଡୁଙ୍ଗୁରି ସଂରକ୍ଷିତ ଜଙ୍ଗଲର ସୁଲିଆଘାଟୀର ପୁରୁଣାପାଣି ଗାଁ’ ନିକଟସ୍ଥ ଜଙ୍ଗଲରେ ପୁଣି ଏକ ଦନ୍ତାହାତୀର ମୃତଦେହ ଠାବ କରାଯାଇଛି । ଏହା ମଧ୍ୟ ଦୁଇଦିନ ତଳର ଘଟଣା ବୋଲି କୁହାଯାଉଛି । ମୃତ ଅଣ୍ଡିରା ଦନ୍ତାହାତୀଟିର ବୟସ ୫୦ ରୁ ୬୦ ବର୍ଷ ବୋଲି ଅନୁମାନ କରାଯାଉଛି ।  ଏହାକୁ ମଧ୍ୟ ବନବିଭାଗ ପକ୍ଷରୁ ସ୍ବାଭାବିକ୍ ମୃତ୍ୟୁ କୁହାଯାଉଥିଲେ ହେଁ , ଏହା ମଧ୍ୟ ସେହିପରି ଚୋରା ବିଦ୍ୟୁତ୍ ତାରର ବାର୍ହାଫାଶରେ ବୋଲି ଚର୍ଚ୍ଚା ହେଉଛି । ସେଠାକୁ ବନବିଭାଗର ଅଧିକାରୀମାନେ ପହଞ୍ଚି ତଦନ୍ତ କରୁଛନ୍ତି । ଉଲ୍ଲେଖନୀୟ ଯେ , ଏଇ ଦ୍ବିତୀୟ ମୃତହାତୀଟିର ଦୁଇଟି ଦାନ୍ତ ସୁରକ୍ଷିତ ରହିଛି ।

ବନବିଭାଗ ସୂତ୍ରରୁ ଜଣାପଡିଛି ଯେ , ବୌଦ୍ଧ – କନ୍ଧମାଳ ଜିଲ୍ଲାରୁ ତେଲ ନଦୀ ପାରିହୋଇ ଏଇ ଋତୁରେ ସୋନପୁରଜିଲ୍ଲା ଦେଇ ବଲାଙ୍ଗୀର ବନଖଣ୍ଡର ଦେଓଗାଁ ଉପରଝର ହେଇ ସୁଲିଆ ଓ ମଠଖାଇ ଜଙ୍ଗଲକୁ ଆସିଥା’ନ୍ତି ।  କୁହାଯାଉଛି ଯେ ଏଇ ୧୨ଘର ବା ୧୨ ଟିକିଆ ବଣୁଆହାତୀଙ୍କ ଦଳରୁ ଗୋଟିଏ ଅସୁରଡୁଙ୍ଗୁରିରେ ମଲାପରେ ସେମାନେ ମୁରିବାହାଲ ପଟକୁ ଚାଲିଯାଇଛନ୍ତି ଓ ଇତିମଧ୍ୟରେ ତାଙ୍କର ୨ ଟି ଛୁଆ ଜନ୍ମ ହୋଇ ମୋଟ ୧୩ ଟି ହାତୀ ଅଛନ୍ତି । ତେବେ ଏଇ ଭୀମଡୁଙ୍ଗୁରି ସଂରକ୍ଷିତ ଜଙ୍ଗଲରେ ମରିଥିବା ଦନ୍ତାହାତୀଟି ଗୋଠଖଣ୍ଡିଆ ହେଇ ଏକାକୀ ବୁଲୁଥିଲା । କିନ୍ତୁ ବନବିଭାଗର ଏସବୁ ତଥ୍ୟ ସେତେଟା ନିର୍ଭରଯୋଗ୍ୟ ନୁହେଁ । କାରଣ ଏଇ ବୟସ୍କହାତୀଟି ମଧ୍ୟ ଜୀବିତ ରହି ବୁଲୁଛି ବୋଲି ଦୁଇଦିନ ତଳେ ସ୍ଥାନୀୟ ଫରେଷ୍ଟ୍ ଗାର୍ଡ ସଞ୍ଜୟ ନନ୍ଦ ରିପୋର୍ଟ କରିଥିବା ବିଭାଗୀୟ ସୂତ୍ରରୁ ପ୍ରକାଶ । ସେହିପରି ଉପରୋକ୍ତ ପ୍ରଥମ ହାତୀଟି ସମ୍ପର୍କରେ ମଧ୍ୟ ହାତୀର ବଞ୍ଚିଥିବା ରିପୋର୍ଟ ସ୍ଥାନୀୟ ବନରକ୍ଷୀ ରିପୋର୍ଟ କରିଥିବା ପ୍ରକାଶ । ଦୁଇଦିନ ପୂର୍ବରୁ ହାତୀଟିର ମୃତଦେହ ଠାବ କରାଯାଇଥିଲା । ଶବବ୍ୟବଚ୍ଛେଦ ରିପୋର୍ଟ ଆସିନାହିଁ । ତେବେ ବନବିଭାଗ ଏହା ସ୍ବାଭାବିକ ମୃତ୍ୟୁ ବୋଲି କୁହାଯାଉଛି ।

ସେ ଯାହାହେଉ , ଏଇ ତଳିଆ କର୍ମଚାରୀଙ୍କ ଅବହେଳା ବ୍ୟତୀତ ଯାହା ଗୁରୁତର , ତା’ ହେଲା , ହାତୀର ଚଲାପଥ ବା ଗତିପଥ ଦେଇ ଯାଇଥିବା ବିଦ୍ୟୁତ୍ ତାରର ବିଶେଷତଃ ରାତିବେଳା ସଂଯୋଗବିଚ୍ଛିନ୍ନ କରା ନଯିବା ।  ପୂର୍ବୋକ୍ତ ଘଟଣାରେ ସେଠାକୁ ତଦନ୍ତବେଳେ ବିଦ୍ୟୁତ୍ ବିଭାଗର ଅଧିକାରୀମାନେ ଯାଇ ତାଙ୍କର କିଛି ଦୋଷ ନଥିବା ସଫେଇ ଦେଇ ଫେରିଯାଇଥିଲେ  ! ପରେ ଅଭିଯୁକ୍ତମାନେ ଗିରଫ ହୋଇ ସ୍ବୀକାର କରିବାରୁ ଏହା ଜଣାପଡିଛି ।

ଦ୍ୱିତୀୟତଃ ପ୍ରମୁଖ ଗୁରୁତର କାରଣଟି ହେଲା , ହାତୀ ଟ୍ରାକର୍ ମାନଙ୍କୁ ବରିଷ୍ଠ ଅଧିକାରୀ ମାନେ ଘରୋଇ ଚାକରଭାବରେ ଖଟାଇବା । ବଲାଙ୍ଗୀର ଡିଭିଜନ୍ ବି ରେଞ୍ଜ୍ ରେ ରହିଥିବା ପାରାଷ୍ଟାଫ୍ ଓ ଏଲିଫ୍ୟାଣ୍ଟ୍ ଟ୍ରାକର୍।ମାନଙ୍କୁ ଡିଏଫଓ , ଏସିଏଫ୍   ରେଞ୍ଜରଙ୍କ ବାସଭବନରେ ଘରୋଇ ଚାକର ଭାବରେ ରନ୍ଧାବଢା , ଲୁଗାକାଚିବା ଓ ଅନ୍ୟାନ୍ୟ ଘରୋଇ କାମରେ ନିୟୋଜିତ କରାଯାଇ ଆସୁଛି । ସେମାନଙ୍କ ପ୍ରକୃତ କାମ ଛଡାଇ ଲୋଇସିଂହା ରେଞ୍ଜ ବା ହରିଶଙ୍କର ରେଞ୍ଜ୍ ସମେତ ଅନ୍ୟଠି ମଧ୍ୟ କେତେକଙ୍କୁ ଡ୍ରାଇଭର ଭାବରେ ମଧ୍ୟ ନିୟୋଜିତ କରାଯାଇଥିବା କୁହାଯାଉଛି । ବିଶ୍ବସ୍ତସୂତ୍ରରୁ ପ୍ରକାଶ ଯେ , ଏବେ ବି ଡିଏଫଓ ସୁଦର୍ଶନ ବେହେରାଙ୍କ ବାସଭବନରେ ଏହି ପାରାକର୍ମଚାରୀ ବା ଏଲିଫ୍ୟାଣ୍ଟ୍ ଟ୍ରାକରଙ୍କ ମଧ୍ୟରୁ ୫ ଜଣ , ଏସିଏଫ୍ ଜିତେନ୍ଦ୍ର ସାହୁଙ୍କ ଘରେ ୩ ଜଣ ଓ ରେଞ୍ଜର ନବୀନ ପଣ୍ଡାଙ୍କ ଘରେ ୨ ଜଣ ଖଟୁଛନ୍ତି  !   ଏହା  ସତ୍ୟ କି ନୁହେଁ , ତଦନ୍ତ ସାପେକ୍ଷ ।

ପ୍ରକାଶଯୋଗ୍ୟ ଯେ , ଗତବର୍ଷ ବଲାଙ୍ଗୀର ବନଖଣ୍ଡରେ ଏବେ ଚାରିଦିନ ଅନ୍ତରରେ  ୨ଟି ଓ ତିନିବର୍ଷ ମଧ୍ୟରେ ୩ ଟି ଏବଂ ଏଯାବତ୍ ୭ ଟି ହାତୀଙ୍କର ମୃତ୍ୟୁ ହେଲାଣି । ପ୍ରାୟ ସବୁ ଜଙ୍ଗଲରେ ମାଇଲ୍ ମାଇଲ୍ ବାଇଣ୍ଡିଂତାର ଟଣାଯାଇ ଖୁଣ୍ଟିପୋତି ସେଥିରେ ଖାଲି ବିଅର୍ ବୋତଲ୍ ଖଞ୍ଜି  ଉଚ୍ଚଶକ୍ତି ସମ୍ପନ୍ନ ବିଦ୍ୟୁତ୍ ତାରରୁ ହୁକିଂ କରାଯାଇ ବାର୍ହାଫାଶ ବସାଯାଇ ଆସୁଛି । ଯେଉଁଥିରେ ହାତୀମାନେ ଲାଗିଯାଇ ମରୁଛନ୍ତି ଓ ଯଥେଷ୍ଟ ବିଳମ୍ବରେ ବନବିଭାଗକୁ ଖବର ମିଳିଲେ ,  ଶବବ୍ୟବଚ୍ଛେଦ ରିପୋର୍ଟକୁ ଟାମ୍ପରିଂ କରାଯାଇ ଆନ୍ଥ୍ରାକ୍ସ ବା ସ୍ବାଭାବିକ୍ ମୃତ୍ୟୁ ଆଳରେ ପ୍ରକୃତ ସତ୍ୟକୁ ଚପାଇ ଦିଆଯାଇ ଆସୁଥିବା ଅଭିଯୋଗ କରାଯାଇଛି ।  ଏଥିରୁ ହାତୀଦାନ୍ତ ତସ୍କରୀର ଭ୍ରମ ମଧ୍ୟ ସୃଷ୍ଟି ହେଉଛି ।

ବଲାଙ୍ଗୀର ବନଖଣ୍ଡର ବିଗତ ଦଶନ୍ଧିରେ ଘଟିଥିବା ମହାବଳ ବାଘ , କଲରାପତରିଆ ଚିତା ବା ଏକାଧିକ ହାତୀମୃତ୍ୟୁର ଶବବ୍ୟବଚ୍ଛେଦ ବା ଫରେନସିକ୍ ରିପୋର୍ଟକୁ ଲୋକଚକ୍ଷୁରୁ ଏଯାବତ୍ ଲୁଚାଯାଇ ଆସିଥିବା ଅଭିଯୋଗର ଚର୍ଚ୍ଚା କ’ଣ ନିରାଧାର  ?