କେବଳ ଲରମ୍ଭା ନା  ସମଗ୍ର ଡିଭିଜନ୍ ରେ ?

ପାଟଣାଗଡ  : ବଲାଙ୍ଗୀର ଜିଲ୍ଲା ପାଟଣାଗଡ ରେଞ୍ଜ୍ ର ଲରମ୍ଭା ସେକ୍ ସନ୍ ରେ ବୃକ୍ଷରୋପଣ ମହାଦୁର୍ନୀତି ହୋଇଛି । ଏସମ୍ପର୍କରେ ଡିଏଫ୍ ଓ ଙ୍କୁ  ପାଟଣାଗଡକୁ  ଡକାଇ ‘କେଉଁଠି ଗଛ ଲଗାଇଛ , ଚାଲ ଦେଖାଇବ ‘ ବୋଲି ପଚାରି ତାଙ୍କୁ ନେଇ ବୁଢାରଜା ପାହାଡ ସମେତ ଦମକିପାଲି , ଠେଲକୋଛାପର ଓ ଲାହେରଜୁରୀ ଆଦି ବିଭିନ୍ନ ଗ୍ରାମରେ ପ୍ରାୟ ୫ କିମି ଚାଲି ଚାଲି ବୁଲିଲେ ସ୍ଥାନୀୟ ବିଧାୟକ ତଥା ଉପମୁଖ୍ଯମନ୍ତ୍ରୀ କନକବର୍ଦ୍ଧନ ସିଂଦେଓ ।  ଚଳିତବର୍ଷର ଟଙ୍କା ଉଠାଯାଇ ସାରିଥିଲେ ହେଁ  ଡିଏଫଓ କେଉଁଠି ବି କୌଣସି ଚାରା ଲଗାଯାଇଥିବା ଦେଖାଇବାରେ ବିଫଳ ହେବାରୁ ଉପମୁଖ୍ଯମନ୍ତ୍ରୀ ତାଙ୍କ ଉପରେ ପ୍ରବଳ ବର୍ଷିଥିବା ଏବେ ଚର୍ଚ୍ଚାର ବିଷୟ ହୋଇଛି ।  ସେଠାରେ କାମ୍ପା , ‘ ମୋ ଜଙ୍ଗଲ ଯୋଜନା ‘ , ମନରେଗା ବା ବାଉଁଶକୁପ୍ ବାବଦରେ କୋଟି କୋଟି ଟଙ୍କା ଖର୍ଚ୍ଚ ଦର୍ଶାଯାଇ ଥିଲେ ହେଁ ଚଳିତବର୍ଷର ପ୍ଲାଣ୍ଟେସନ୍ ର ଚିହ୍ନବର୍ଣ୍ଣ ଦେଖିବାକୁ ମିଳି ନଥିବାରୁ ମନ୍ତ୍ରୀ ରାଗିଯାଇଥିଲେ ।  ଏପରିକି ପାହାଡଉପରେ  ଏ ବର୍ଷର ଗଛ କାହିଁ ? ‘ ବୋଲି ପଚାରିବାରୁ ସେସବୁ ଗଛ ଗତ ୨୦୨୧- ୨୨ ବର୍ଷର ବୋଲି ଜଣାପଡିଛି । ଡିଏଫଓ ସୁଦର୍ଶନ ବେହେରା ଏଥିର ଉଚିତ୍ ପ୍ରମାଣ ଦେଖାଇପାରି ନଥିଲେ । ତେଣୁ ଏଥିରେ କର୍ତ୍ତବ୍ୟରେ ଅବହେଳା ଦର୍ଶାଯାଇ ଶନିବାର ରାତି ୧୨ଟା ବେଳେ ଜଣେ ଫରେଷ୍ଟର ପ୍ରିୟବ୍ରତ ନାଏକଙ୍କୁ ତୁରନ୍ତ ରାତିଅଧିଆ ନିଲମ୍ବିତ କରାଯାଇଥିବା ପ୍ରକାଶ । ତାଙ୍କ ସ୍ଥାନରେ ବିରଞ୍ଚି କୁମ୍ଭାରଙ୍କୁ ଅବସ୍ଥାପିତ କରାଯାଇଛି ।

ଉଲ୍ଲେଖନୀୟ ଯେ , ସଂପ୍ରତି କିଛିବର୍ଷ ହେଲା ପାଟଣାଗଡ ବନାଞ୍ଚଳରେ ଆନନ୍ଦ ଚନ୍ଦ୍ର ବିଶି ରେଞ୍ଜର ଅଛନ୍ତି । ତାଙ୍କ ପୂର୍ବରୁ ସେଠାରେ ଥିବା ରେଞ୍ଜରଙ୍କ ସମୟରେ ମନରେଗାରେ ଏହି ସେକ୍ସନରେ ଲକ୍ଷାଧିକ ଟଙ୍କାର ଦୁର୍ନୀତି କରାଯାଇଥିବା ଅଭିଯୋଗ ପ୍ରକାଶ ପାଇଥିଲା ।  ଏପରିକି ଶ୍ରମିକପାଉଣା ବାକିଥିବା ଅଭିଯୋଗରେ ବାନ୍ଧନପାଲି ଗାଁ’କୁ ଯାଇଥିବାବେଳେ ରେଞ୍ଜର ଓ ଷ୍ଟାଫ୍ ଙ୍କୁ ଗ୍ରାମବାସୀମାନେ ଘେରାଓ କରି ରଖିଥିଲେ । ଶେଷରେ ପୁଲିସ୍ ପହଞ୍ଚି ଓ ଫୋନ୍ ରେ ତତ୍କାଳୀନ ଡିଏଫଓ  ନୀତିଶ କୁମାର ପ୍ରତିଶ୍ରୁତି ଦେବାପରେ ଲୋକେ ତାଙ୍କୁ ବିଳମ୍ବିତ ରାତିରେ ଛାଡିଥିଲେ । ସେହି ମାମଲାରେ ଜଣେ ମହିଳା ଫରେଷ୍ଟ୍ ଗାର୍ଡଙ୍କୁ ଖପ୍ରାଖୋଲକୁ ବଦଳି କରିଦିଆଯାଇ ଥିଲେ ହେଁ , ସେ ଯାଇ ନଥିଲେ ଓ ତାଙ୍କ ବଦଳିକୁ ପରେ ବାତିଲ୍ କରିଦିଆଯାଇଥିବା ଜଣାଯାଇଥିଲା ।  ଆହୁରି ମଧ୍ୟ ପୂର୍ବତନ ଡିଏଫଓ ଏହି ରେଞ୍ଜ ସମେତ ଡିଭିଜନର  କଣ୍ଟାବାଞ୍ଜି ସମେତ ଅନ୍ୟାନ୍ୟ ରେଞ୍ଜ୍ କୁ ଅଡିଟ୍ ରିପୋର୍ଟ ଅନୁଯାୟୀ , ଖର୍ଚ୍ଚ କରାଯାଇ ନଥିବା ଓ ମିଥ୍ୟାବିଲ୍ କରାଯାଇ ହଡପ କରାଯାଇଥିବା ସରକାରୀ ଅର୍ଥର ଭରଣା କରିବାକୁ ନିର୍ଦ୍ଦେଶ ଦେଇଥିଲେ । ଏହି ପରିପ୍ରେକ୍ଷୀରେ ସେତେବେଳେ ପାଟଣାଗଡର ଏହି ରେଞ୍ଜରଙ୍କୁ ଏ ସମ୍ପର୍କରେ ପଚରାଯିବାରୁ ସେ ‘ ସମୁଦ୍ରରେ ପଡିଥିବା ହାଡକୁ କ’ଣ କେହି ଫେରାଇପାରେ ? ‘ ବୋଲି ଓଲଟି ହେୟଜ୍ଞାନ କରିଥିଲେ । ଏହାସହିତ ଏହି ରେଞ୍ଜ୍ ରେ ଦୁଇଜଣ ବନକର୍ମଚାରୀ ବନସୁରକ୍ଷା କମିଟିର କର୍ମକର୍ତ୍ତାଙ୍କ ଠାରୁ ଲାଞ୍ଚ ନେଲାବେଳେ ରେଞ୍ଜ୍ ଅଫିସ୍ ପରିସରସ୍ଥ ସରକାରୀ ବାସଭବନରୁ ଜଣେ ଓ  ଲରମ୍ଭା ସେକ୍ସନର ଜଣେ ଭିଜିଲାନ୍ସ ହାତରେ ଗିରଫ ହୋଇଥିଲେ ।  ଏବେ ଶେଷରେ ଏଇ ବନାଞ୍ଚଳର ପାପ ବେଶିହେବା ଯୋଗୁଁ ଉପମୁଖ୍ଯମନ୍ତ୍ରୀଙ୍କ ହାତରେ ଧରାପଡିଲେ ବୋଲି ଚର୍ଚ୍ଚା ହେଉଛି ।  ସବୁଠାରୁ ଗୁରୁତର ଅଭିଯୋଗ ଏହା ଯେ ବିଭାଗୀୟ ଯୋଜନାର ବିଲ୍ ରୁ ୨୫ ରୁ ୩୦ ପ୍ରତିଶତ ପିସି ନିଆଯାଉଥିବା ଅସମର୍ଥିତ ସୂତ୍ରରୁ ପ୍ରକାଶ । ଏହା ସତ୍ୟ ହୋଇଥିଲେ , ସାଙ୍ଘାତିକ୍  !

ତେବେ କେବଳ ଏଭଳି ଦୁର୍ନୀତିର ଅଭିଯୋଗ ପାଟଣାଗଡ ରେଞ୍ଜ୍ ରେ ନୁହେଁ , ହରିଶଙ୍କର ବନାମ ଖପ୍ରାଖୋଲ , ଲାଠୋର , କଣ୍ଟାବାଞ୍ଜି , ଲୋଇସିଂହା , ମୁରିବାହାଲ , ଦେଓଗାଁ , ସଇଁନ୍ତଳା , ଟିଟିଲାଗଡ ଓ ସଦର ବଲାଙ୍ଗୀର ରେଞ୍ଜ୍ ଗୁଡିକରେ ବିଗତବର୍ଷମାନଙ୍କରେ କାମ୍ପା , ମନରେଗା , ମୋ ଜଙ୍ଗଲ ଯୋଜନା , ପଥପାର୍ଶ୍ବ ବନୀକରଣ , ମହାବଳ ବାଘ , ଚିତାବାଘ ,ହାତୀ , ବାର୍ହା , ହରିଣ , ବଜ୍ରକାପ୍ତାଦି ଅବାଧ ବନ୍ୟପ୍ରାଣୀ ଶିକାର ସହ ଟିଟିଲାଗଡ- ମୁରିବାହାଲ ରେଞ୍ଜ୍ ଅନ୍ତର୍ଗତ ସଂରକ୍ଷିତ ଜଙ୍ଗଲରେ ଚୋରା ରତ୍ନପଥର ଖନନ ଓ ଲୋଇସିଂହା ରେଞ୍ଜ୍ ର  ଏଇ ଲରମ୍ଭା ସଂରକ୍ଷିତ ଜଙ୍ଗଲାଞ୍ଚଳରୁ ଚୋରା ଲୁହାପଥର , ମାଙ୍ଗାନିଜ୍ ଖଣିଚୋରି ଇତ୍ୟାଦି ବହୁ ଗୁରୁତର ମାମଲାକୁ ଚପାଇ ଦିଆଯାଇ ଆସିଥିବା ଗଣମାଧ୍ୟମରେ ଖବର ପ୍ରକାଶ ପାଇଥିଲା । କିଛିବର୍ଷ ତଳେ ଲାଠୋର ବନାଞ୍ଚଳର ଚୋରମରା ଗ୍ରାମର ପତରାରେ ଏକ ମହାବଳ ବାଘର ମୃତଦେହ ଉଦ୍ଧାର ହୋଇଥିଲା । ଅଦ୍ୟାବଧି ବଲାଙ୍ଗୀର ବନଖଣ୍ଡରେ ପ୍ରାୟ ୯ ଟି ବଣୁଆହାତୀଙ୍କର ମୃତଦେହ ଉଦ୍ଧାର କରାଯାଇଛି । ସଂପ୍ରତି ଏକାଧିକ ବଣୁଆହାତୀଙ୍କ ମୃତ୍ୟୁ ଚାଞ୍ଚଲ୍ଯ ସୃଷ୍ଟି କରିଛି । କ୍ଷୋଭର ବିଷୟ ଯେ କେବେ ହାତୀ ମୃତ୍ୟୁର କାରଣ ଆନ୍ଥ୍ରାକ୍ସ ତ କେବେ ବାଘମୃତ୍ୟୁ ଅନାହାରରେ ଓ ଏବେ ଦୁଇଦିନ ତଳର ଭୀମଡୁଙ୍ଗୁରି ସୁଲିଆ ସଂରକ୍ଷିତ ଜଙ୍ଗଲରେ ଏକ ବୟସ୍କ ଦନ୍ତାହାତୀର ମୃତ୍ୟୁ ସ୍ବାଭାବିକ୍ ବୋଲି ବନବିଭାଗ ସଫେଇ ଦେଇ ପ୍ରକୃତ କାରଣକୁ ଚପାଇଆସୁଥିବା ଅଭିଯୋଗ ହେଉଛି ।

ଏଣୁ ଏସବୁ ପ୍ରତି ମଧ୍ୟ ଉପମୁଖ୍ଯମନ୍ତ୍ରୀ , ଜଙ୍ଗଲ ମନ୍ତ୍ରୀ ଓ ମୋହନ ସରକାର ଦୃଷ୍ଟି ଦିଅନ୍ତୁ  !