ଖବରପ୍ରକାଶ ପରେ ବି ନୋ ଆ କ୍ ସ ନ୍ !
କଣ୍ଟାବାଞ୍ଜି : ବଲାଙ୍ଗୀର ଜିଲ୍ଲାର ବଙ୍ଗୋମୁଣ୍ଡା ତହସିଲ ଅନ୍ତର୍ଗତ ସାନଗମଡା ଗ୍ରାମରେ ବେଆଇନ୍ ପଥର ବ୍ଲାଷ୍ଟିଂ ଓ କ୍ରସର୍ ଚାଲିଥିବା ଗଣମାଧ୍ୟମରେ ଖବର ପ୍ରକାଶ ପାଇଥିଲା । ଏହି ଅନୁଯାୟୀ , ଭାଲୁମୁଣ୍ଡା ଗ୍ରାମର ଶ୍ୟାମ ମେହେର ଏହି କ୍ରସରର ମାଲିକ । ପ୍ରାୟ ପ୍ରତିଦିନ ଏହି କ୍ରସର ଓ ବେଆଇନ୍ ଭାବରେ ବାରୁଦ ଲଗାଇ ପଥର ବ୍ଲାଷ୍ଟିଂ ଫଳରେ ଆଖପାଖ ଗାଁ’ ଓ ଚାଷଜମିରେ ପଥରଗୁଣ୍ଡ ଏବଂ ଧୂଳିରେ ଜନଜୀବନ ଅସ୍ତବ୍ଯସ୍ତ ହୋଇପଡୁଥିବା ଗ୍ରାମବାସୀ ଅଭିଯୋଗକ୍ରମେ ଏହି ଖବରଟି ସ୍ଥାନୀୟ ସାମ୍ବାଦିକଙ୍କ ଦ୍ବାରା ପ୍ରକାଶ ପାଇଛି ।
ଉଲ୍ଲେଖନୀୟ ଯେ ବିଗତ ନବେ ଦଶକରେ ଚରମ ଦାରିଦ୍ର୍ଯ ଯୋଗୁଁ ଏଇ ଭାଲୁମୁଣ୍ଡା ଗ୍ରାମରେ ଭୂମିସୂତା ନାମ୍ନୀ ୧୨ ବର୍ଷୀୟା ବାଳିକାଟିର ପିଲାବିକ୍ରି ଓ ସାନଗମଡା ଗ୍ରାମରେ ପ୍ରେମଶୀଳା ଅନାହାରମୃତ୍ୟୁ ଅଭିଯୋଗ ଦେଶବିଦେଶ ବ୍ୟାପି ପ୍ରବଳ ଚର୍ଚ୍ଚା ଓ ରାଜନୈତିକ ଆଲୋଡନ ସୃଷ୍ଟି କରିଥିଲା । ଆପାତତଃ ଏଇଥିରୁ ଇ କେବିକେ ଯୋଜନାର ସୃଷ୍ଟି ବୋଲି କୁହାଯାଏ । ଏ ସମ୍ପର୍କରେ ତହସିଲଦାର , ପ୍ରଶାସନ ବନାମ ସରକାରଙ୍କ ଗୋଚରକୁ ଏହି ଅଭିଯୋଗ ଆସିବାପରେ ବି କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ଜଣାଯାଇନାହିଁ ।
ଏ ସମ୍ପର୍କରେ ସମ୍ପୃକ୍ତ କ୍ରସରମାଲିକ ଶ୍ୟାମ ମେହେରଙ୍କୁ ପଚରାଯିବାରୁ ସେ ବିଭାଗୀୟ ଅନୁମତିକ୍ରମେ ଏହା ଚଳାଇ ସରକାରଙ୍କୁ କୋଟି କୋଟି ଟଙ୍କାର ରାଜସ୍ୱ ପଇଠ କରି ଆସୁଥିବା ଓ ପ୍ରକାଶିତ ଅଭିଯୋଗର ସତ୍ୟତା ନଥିବା ଫୋନ୍ ରେ ସଫେଇ ଦେଇଥିଲେ । ଆହୁରି ମଧ୍ୟ ସେ ଏଭଳି ଖବର ପ୍ରକାଶକୁ ଆଦୌ ଖାତିର୍ କରୁନାହାଁନ୍ତି ଓ ଉତ୍କୋଚ ଦେବାକୁ ଇଙ୍ଗିତ ଦେଇ ଘରେ ଲୁଚିରହି ଘରେ ନଥିବା କହି ଲୁଚି ଯାଇଥିଲେ । ତେବେ ସେ ନାମମାତ୍ର ଅନୁମତି ନେଇ ତହସିଲଦାରଙ୍କୁ ଧରାକରା କରି ବିନାନୁମତିରେ ଆଖପାଖ ଅଞ୍ଚଳରେ ମାଡିଯାଇ ବେଆଇନ୍ ବିସ୍ଫୋରଣ ଓ କ୍ରସର ଚଳାଉଥିବା ଅଭିଯୋଗକୁ ସତ୍ୟ ବୋଲି ପ୍ରକାଶ କରିଛନ୍ତି । ଏଣୁ ବେଆଇନ୍ କ୍ରସର ବୋଲି ଅଭିଯୋଗ ପ୍ରକାଶ ପାଇଥିବା ଓ ସେ କେଉଁଠୁ ଏହି ବିସ୍ଫୋରକ ସାମଗ୍ରୀ ଆଣି ବ୍ଲାଷ୍ଟିଂ କରୁଛନ୍ତି , ଏଥିପାଇଁ ତାଙ୍କୁ କିଏ ଅନୁମତି ଦେଲା , ତଦନ୍ତ ସାପେକ୍ଷ । ସେ ପ୍ରକୃତରେ ସରକାରଙ୍କୁ କୋଟି କୋଟି ଟଙ୍କାର ରାଜସ୍ୱ ପଇଠ କରୁଛନ୍ତି ନା ରାଜସ୍ୱ ଫାଙ୍କୁଛନ୍ତି , ଏହାର ତଦନ୍ତ ଜରୁରୀ ।
ଏଣୁ ସ୍ଥାନୀୟ ବଙ୍ଗୋମୁଣ୍ଡା ତହସିଲଦାର , ଟିଟିଲାଗଡ ଉପଜିଲ୍ଲାପାଳ ଓ ବଲାଙ୍ଗୀର ଜିଲ୍ଲା ଖଣି ଅଧିକାରୀ ପ୍ରମୁଖ ଏଥିପ୍ରତି ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଲୋକେ ଦାବି କରିଛନ୍ତି ।