ବିକାଶର ସଂଜ୍ଞା କେବଳ ଟଙ୍କାବଣ୍ଟନ ବା ବିଜ୍ଞାପନ ନୁହେଁ  !

ଭୁବନେଶ୍ବର  : ସଂପ୍ରତି ଖବରକାଗଜ ବା ଗଣମାଧ୍ୟମରେ ନୂତନ ମୋହନ ଡବଲଇଞ୍ଜିନ୍ ସରକାରର ବଡ ବଡ ବିଜ୍ଞାପନୀଘୋଷଣା ବା ପ୍ରତିଶ୍ରୁତିର ପ୍ରତିପାଳନର  ଶହେଦିନର ରିପୋର୍ଟକାର୍ଡ ପ୍ରକାଶ ପାଇଛି । ଏଥିରେ ଦେଶର ବିକାଶ ରେଳରେ ଓଡିଶା ପ୍ରଥମ ବଗି ହେବ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି । ଏଥିରେ ସୁଭଦ୍ରା ଯୋଜନାରେ ୧ କୋଟି ମହିଳାଙ୍କୁ ସହାୟତା ମିଳିବା , ଦୁର୍ନୀତି ପାଇଁ ଅଦ୍ୟାବଧି ୭୧ ଟି ମାମଲାରେ ୫୮ ଜଣଙ୍କୁ ଜେଲ୍ , ୫ ବର୍ଷରେ ଦେଢଲକ୍ଷଙ୍କୁ ନିଯୁକ୍ତି ଲକ୍ଷ୍ୟ , ରାଉରକେଲା ସମ୍ବଲପୁର ପାରାଦ୍ବୀପ ଓ ଧାମରାରେ ଶିଳ୍ପ କରିଡର , ଭୁବନେଶ୍ବରରେ ଦେଶର ପ୍ରଥମ ସେମି କଣ୍ଡକ୍ଟର ମାନୁଫାକ୍ଚରିଂ ସୁବିଧା ଓ ନିଯୁକ୍ତ ହେବେ ୩ ହଜାର ଡାକ୍ତର ଓ ପାରା ମେଡିକାଲ କର୍ମଚାରୀ ଇତ୍ୟାଦି ପ୍ରମୁଖ ହେଡ୍ ଲାଇନ୍ ରେ ଖବର ପ୍ରକାଶ ପାଇଛି । ପୁରୀଠାରେ ଗତ ୧୯ ତାରିଖରେ ଶରଧାବାଲିଠାରେ ଆୟୋଜିତ ବିଜେପି ସରକାରର ୧୦୦ଦିନ ପୂର୍ତ୍ତି ଉପଲକ୍ଷେ ରାଜ୍ୟସ୍ତରୀୟ ଉତ୍ସବ ପାଳିତ ହେବା  ଅବସରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଭାଷଣରେ କହିଛନ୍ତି ଯେ ଶିକ୍ଷା , ସ୍ବାସ୍ଥ୍ୟ , ଶିଳ୍ପ , ଗମନାଗମନ ସବୁକ୍ଷେତ୍ରରେ ଓଡିଶା ବିକଶିତ ରାଜ୍ୟରେ ପରିଣତ ହେବ । ୨୦୩୬ ସୁଦ୍ଧା ତାଙ୍କ ସରକାର ସମୃଦ୍ଧ ଓଡିଶା ଓ ୨୦୪୬ ସୁଦ୍ଧା ବିକଶିତ ଓଡିଶା ଲକ୍ଷ୍ୟ ପୂରଣ କରିବ । ରେଳପଥ , ଆକାଶ ପଥ , ସଡକ ପଥ ଓ ଜଳପଥର ବିକାଶ କରି ରାଜ୍ୟ ପ୍ରଗତିର ଏକ ସୁବର୍ଣ୍ଣଯୁଗ ଆରମ୍ଭ କରିବାକୁ ତାଙ୍କ ସରକାର ପ୍ରତିଶ୍ରୁତିବଦ୍ଧ । ଆମେ ଯେଉଁ ପ୍ରତିଶ୍ରୁତି ଦେଇଥିଲୁ , ସେଥିରୁ ପ୍ରମୁଖ ପ୍ରତିଶ୍ରୁତି ପାଳନ କରି ସାରିଛୁଁ ଓ ସଂକଳ୍ପପତ୍ରର ବାକି ପ୍ରତିଶ୍ରୁତି ୫ ବର୍ଷ ମଧ୍ୟରେ କରି ଦେଖାଇବୁ ।

ଏତିକିଦିନରେ ପ୍ରତିଶ୍ରୁତିର ପ୍ରତିପାଳନର ଉଦାହରଣ ଦେଇ ମୁଖ୍ୟମନ୍ତ୍ରୀ ଶ୍ରୀ ମନ୍ଦିରର ଚାରିଦ୍ବାର ଖୋଲିବା , ରତ୍ନଭଣ୍ଡାରର ଅଳଙ୍କାରର ଗଣତିମଣତି ପ୍ରକ୍ରିୟା ଆରମ୍ଭ , ଶ୍ରୀ ମନ୍ଦିରର ଉନ୍ନତି ପାଇଁ ୫ ଶହକୋଟିର କର୍ପସ ପାଣ୍ଠି ଗଠନ , ଧାନର ସର୍ବନିମ୍ନ ସହାୟକ ମୂଲ୍ୟ ୩୧ ଶହ ଟଙ୍କା ପ୍ରଦାନ ,  ପିଏମ୍ କିଷାନ୍ ଯୋଜନାରେ ଚାଷୀଙ୍କୁ ଆର୍ଥିକ ସହାୟତା ବ୍ୟବସ୍ଥା , ସୁଭଦ୍ରା ଯୋଜନାରେ ପ୍ରଥମ କିସ୍ତିରେ ୨୫ ଲକ୍ଷ ଟଙ୍କାର ସହାୟତା ମିଳିସାରିଥିବା , ଖୁବ୍ ଶୀଘ୍ର ଆୟୁଷ୍ମାନ୍ ଯୋଜନା ସହ ଗୋପବନ୍ଧୁ ଜନ ଆରୋଗ୍ଯ ଯୋଜନାରେ ରାଜ୍ୟର ୨୭ ହଜାର ଡାକ୍ତରଖାନାରେ ସ୍ବାସ୍ଥ୍ୟସେବା ସୁବିଧା ଓ ଶିକ୍ଷା , ଶିଳ୍ପ ଓ ଅନ୍ୟାନ୍ୟ ଯୋଜନାର ଶୁଭାରମ୍ଭ ହେଉଥିବାର ସୂଚନା ଦେଇଛନ୍ତି । ସବୁ ଠିକ୍ । ଅୟମାରମ୍ଭ ଶୁଭାୟ ଭବତୁ  !

ତେବେ ଗତ ବିଜେଡି ସରକାର ମଧ୍ୟ ଏଭଳି ବହୁ ନଭଶ୍ଚୁମ୍ବୀ ଅଭିନବ ଆଧୁନିକ ବୈଷୟିକ ଜ୍ଞାନକୌଶଳର ଯୋଜନାର ଘୋଷଣା କରି ବିଗତ ୨୪ ବର୍ଷ ମଧ୍ୟରେ ଓଡିଶାକୁ ଦାଦନପ୍ରବଣ , ମାଓ ଉପଦ୍ରୁତ , ତୃଣମୂଳସ୍ତରରୁ ଶୀର୍ଷସ୍ତର ପର୍ଯ୍ୟନ୍ତ ଦୁର୍ନୀତିଖୋର୍ ପରମ୍ପରାରେ ପରିଣତ କରିଦେଇ ସରକାରୀ ଯୋଜନା ସମେତ ଖଣି ପାଣି ବାଲି ଜଙ୍ଗଲ ଲୁଣ୍ଠନ ,ଓଡିଆ ଅସ୍ମିତା ବିପନ୍ନ ହୋଇପଡିବା ସହିତ ଖୋଦ୍ ଗୃହରାଷ୍ଟ୍ରମନ୍ତ୍ରୀଙ୍କ ବିରୁଦ୍ଧରେ ମମିତା ମେହେର ହତ୍ୟା ଓ ଅପରାଧରେ ରାଜ୍ୟ ବ୍ୟାପି ଆନ୍ଦୋଳନ ଓ ସ୍ବାସ୍ଥ୍ୟମନ୍ତ୍ରୀଙ୍କୁ ସ୍ପଷ୍ଟ ଦିବାଲୋକରେ ହଜାର ହଜାର ଲୋକଙ୍କ ସମ୍ମୁଖରେ ଜଣେ କର୍ତ୍ତବ୍ୟରତ ପୁଲିସ୍ ଅଧିକାରୀଙ୍କ ଦ୍ୱାରା ଚାଞ୍ଚଲ୍ୟକର ହତ୍ୟାକାଣ୍ଡ ଓ ଅନ୍ୟାନ୍ୟ ଅନେକ ଅପରାଧମାମଲାର ତ୍ରୁଟିପୂର୍ଣ୍ଣ ତଦନ୍ତ ପରି ଆଇନ୍ ଶୃଙ୍ଖଳା , ଅପରାଧ ଓ ନ୍ୟାୟ ବ୍ୟବସ୍ଥାର ଧଜ୍ଜିଆ ଉଡାଇଦେଇ ଏକଛତ୍ରବାଦୀ ଶାସନର ନମୁନା ଦେଖାଇ ବିତାଡିତ ହୋଇଗଲା ।  ତା’ ପୂର୍ବର କଂଗ୍ରେସ ସରକାର ମଧ୍ୟ ରାଜ୍ୟରେ ଦୁର୍ନୀତି , ବ୍ୟଭିଚାର ବୃଦ୍ଧି କରି ଅତିଷ୍ଠ କରି ତଡା ଖାଇଲା ଯେ ଅଦ୍ୟାବଧି ସ୍ଥିତି ସଳଖେଇ ପାରୁନି ! ହଜାରେ ଦିନର ହଜାରେ ଶିଳ୍ପର ପଚାଅଣ୍ଡା ପାରି ଶେଷରେ ରାଜ୍ୟକୁ ଅନାହାରମୃତ୍ୟୁ , ପିଲାବିକ୍ରି ଓ ରାଜ୍ୟବାହାରକୁ ଦାଦନଚାଲାଣ ପରି ମଣିଷବେପାରର ମୂଳଦୁଆ ପକାଇ ଖୋଳ କରିଦେଇଥିଲା ।  ତେଣୁ ଏବେ କେଉଁଦଳର କାହାକଥାକୁ ରାଜ୍ୟବାସୀ ଭରସା କରିବେ  ?

ଏଇ କିଛିଦିନତଳେ ବରିଷ୍ଠ ସାମ୍ବାଦିକ ରୁବେନ୍ ବାନାର୍ଜୀଙ୍କ ୟୁ ଟ୍ୟୁବ୍ ଚ୍ୟାନେଲ୍ ର ପ୍ରଥମ ଏପିସୋଡ୍ ରେ ଉପସ୍ଥାପିତ ‘ ମୋହନ ସରକାର ପ୍ରଥମ ଟେଷ୍ଟରେ ବିଫଳ ‘ ଚର୍ଚ୍ଚା କ’ଣ ନିରାଧାର  ?  ଖୋଦ୍ ମାନନୀୟ ରାଜ୍ୟପାଳଙ୍କ ପୁଅ ଜଣେ କର୍ତ୍ତବ୍ୟରତ ପୁଲିସ୍ କର୍ମଚାରୀଙ୍କୁ ମାଡମାରି ଲହୁଲୁହାଣ କରି ଥାନାରେ ଏତଲା ଦିଆଯିବା ସତ୍ତ୍ୱେ ମାମଲା ଋଜୁ କରା ନଯାଇ ବିନା ତଦନ୍ତରେ ଏତେବଡ ଚର୍ଚ୍ଚିତ ଘଟଣାଟିକୁ ମୁଖ୍ୟମନ୍ତ୍ରୀଙ୍କ ଗୋଚର ସତ୍ତ୍ୱେ ଉଡାଇଦିଆଯିବା କ’ଣ ‘ ପଣ୍ଡିତ ପୁଅ ମାଙ୍କଡ଼ ମାଇଲେ ଦୋଷ ନାହିଁ ‘ ଆପ୍ତବାକ୍ୟଟିର ଜ୍ବଳନ୍ତ ଉଦାହରଣ ନୁହେଁ  ?

ଧାନର ସର୍ବନିମ୍ନ ସହାୟକ ମୂଲ୍ୟ ବୃଦ୍ଧି ଘୋଷଣା କରିଦେଲେ ସମସ୍ୟାର ସମାଧାନ ହେଇଯିବ ବୋଲି ଭାବିଦେବା ଏକ ଭ୍ରମ । ଯେଉଁଠି ସମବାୟ ବିଭାଗର ଅଧିକାରୀଙ୍କ ଠାରୁ ପ୍ରାଥମିକ କୃଷି ସମବାୟ ସମିତି ବା ପେକ୍ସ କର୍ମଚାରୀ ଓ ଡିଇଓମାନଙ୍କର ଅବାଧ ଦୁର୍ନୀତି ସହ ମିଲର୍ସ ଓ ଯୋଗାଣ ବିଭାଗର ଅସାଧୁ ମଧୁଚନ୍ଦ୍ରିକା ଗତ ସରକାର ଅମଳରୁ ଗଡି ଆସୁଛି , ସେଠାରେ ଚାଷଜମିରୁ ଅଧିକ ଧାନଫସଲ ଉତ୍ପାଦନ ଦର୍ଶାଇ ରାଜ୍ୟବାହାରକୁ ଚୋରାଚାଲାଣ କରୁଥିବା ବେପାରୀ ମିଛଚାଷୀ ବା ଫେକ୍ ଭେଣ୍ଡରଙ୍କ କାରବାର ବନ୍ଦ ହୋଇନାହିଁ , ସେଠାରେ ଏଭଳି ଆହୁରି ଲୁଣ୍ଠନକୁ ପ୍ରୋତ୍ସାହିତ କରିବା ସରକାରଙ୍କର ଏକ ଉପରଠାଉରିଆ ଭୋଟ୍ ବ୍ୟାଙ୍କ ସୁରକ୍ଷାର ବାହାସ୍ଫୋଟ !
ରାଜ୍ୟରେ ଗାଁ ଗାଁ ରେ କ୍ବାକ୍ , ବଙ୍ଗାଳୀ ଡାକ୍ତର ଓ ଗ୍ରାମାଞ୍ଚଳ ସ୍ୱାସ୍ଥ୍ୟକେନ୍ଦ୍ରରୁ ଆରମ୍ଭ କରି ସହରାଞ୍ଚଳ ଯାଏ ଛତୁ ଫୁଟିଲା ପରି ଅନଭିଜ୍ଞ ଡାକ୍ତରଙ୍କ ସହାୟତାରେ ସୁପରସ୍ପେଶାଲିଟି ଘରୋଇ ହସ୍ପିଟାଲରେ ଚିକିତ୍ସା ଆଳରେ ରୋଗୀଶୋଷଣ ଓ ସରକାରୀ ସ୍ବାସ୍ଥ୍ୟକାର୍ଡର ବାଟମାରଣା ଅବ୍ୟାହତ ରହିଛି ଓ  ସରକାରୀ ସ୍ବାସ୍ଥ୍ୟସେବା ଏକ ପ୍ରହସନ ପାଲଟିଛି , ସେଠାରେ ସରକାରଙ୍କର ଏତେ ଡିଣ୍ଡିମପିଟାର ପରିଣତି ଅଗ୍ରେ ଧାବତି ଧାବତି  !

ବେକାରୀସମସ୍ୟା ଉତ୍କଟ ହୋଇପଡିଥିବା ବେଳେ ଚାକିରୀ ଦେବାକୁ ଠିକା ବା ଆଉଟ୍ ସୋର୍ସିଂ ଘରୋଇକରଣ , ବିଜୁଳି ବିଭାଗର ଘରୋଇକରଣ ଆଳରେ ଥରକୁ ଥର କମ୍ପାନୀବଦଳ , ଶିକ୍ଷାବ୍ୟବସ୍ଥାର ଘରୋଇ ଶିକ୍ଷାବେପାରକୁ ବିଭିନ୍ନ ଆଳରେ ସରକାରୀ ସହାୟତା , ଆନ୍ତଃରାଜ୍ୟ ଜାଲ୍ ସାର୍ଟିଫିକେଟ୍ ମାମଲା ଓ ଆନ୍ତର୍ଜାତୀୟ ଚିଟ୍ ଫଣ୍ଡ , ବିଦେଶୀ  ସାଇବର ଟ୍ରେଡିଂ ସହ ମୋବାଇଲ୍ ଆପ୍ ର କୋଟି କୋଟି ଟଙ୍କାର ହଡପ ମାମଲା ପ୍ରତି ପୁଲିସ୍ , ଭିଜିଲାନ୍ସ , ସାଇବର ପୁଲିସ୍ ଓ ଇଡି ଆଦି ତଦନ୍ତକାରୀ ସଂସ୍ଥାମାନଙ୍କର ଅନାଗ୍ରହ ଓ ଅପାରଗତା ଇତ୍ୟାଦିରେ ରାଜ୍ୟବାସୀ ହନ୍ତସନ୍ତ ହୋଇପଡିଥିବା ବେଳେ ଏଭଳି ୧୦୦ ଦିନିଆ ରିପୋର୍ଟ କାର୍ଡର ଘୋଷଣା ଅବାଗିଆ ଶୁଭୁଛି ।  ଏଥିରେ ପୁଣି ଜଣେ ହତାଶିଆ ତଥାକଥିତ ରାଜନେତା ତଥା ଆକ୍ରାମକ ସମ୍ବାଦବେପାରୀଙ୍କ ନୂଆ ସରକାରକୁ ଥୁକପାଲିସ୍ କରିବାର  ଚାଟୁକାରୀ ମନ୍ତବ୍ଯ ଆହୁରି ହାସ୍ୟାସ୍ପଦ  !

ଏହା ସହିତ ଏଇ ଦଳର ନିର୍ବାଚିତ ବିଧାୟକ , ମନ୍ତ୍ରୀ , ସାଂସଦଙ୍କର ଚରିତ୍ର ଓ କାର୍ଯ୍ୟକଳାପ କିଭଳି ଲୋକେ ଭଲଭାବରେ ଅବଗତ । ସେଇ ପିସି , ଠିକାକାମ , ସରକାରୀ ଦପ୍ତରରେ ଲାଞ୍ଚ କାରବାର ଓ ଲୋକଙ୍କୁ ନ୍ୟାୟ ମିଳୁ ନଥିବା ଆଦି ଅସାଧୁବ୍ୟବସ୍ଥା ଏବଂ  ଓଡିଶାରେ ପ୍ରକୃତ ସାମାଜିକ ନ୍ୟାୟ ଓ ମାନବିକ ମୂଲ୍ୟବୋଧର ପୁନରୁତ୍ଥାନ କେବଠାରୁ  ? ପ୍ରତ୍ୟେକ ନାଗରିକର ଅଧିକାରର ସୁରକ୍ଷା ଓ ସ୍ବାଭିମାନର ରକ୍ଷା କେବଠୁଁ  ?

ସେଇ କଳଙ୍କିଲଗା ବ୍ୟବସ୍ଥା , ତଥାପି ଦାଦନଚାଲାଣର ସ୍ରୋତ କମୁ ନଥିବାର ଦୃଶ୍ୟ ,  ଜଣେ ଡିଏଫଓର ପିସି ଚାପରେ ଜଣେ ଫରେଷ୍ଟରଙ୍କ ଆତ୍ମହତ୍ୟା , ଶିଶୁଖାଦ୍ୟ ଛତୁଆରୁ ଲକ୍ଷାଧିକ ଟଙ୍କାର ତୁଙ୍ଗ ଲୋକପ୍ରତିନିଧିଙ୍କର ବଟିଦାବି ଚର୍ଚ୍ଚା , ଚର୍ଚ୍ଚିତ ନରହତ୍ୟା ଅପରାଧ ମାମଲାର ତଦନ୍ତରେ ଅବହେଳା ,  ପ୍ରତି ପଞ୍ଚାୟତ , ବ୍ଲକ୍ ଓ ଥାନାରେ ଲାଞ୍ଚମିଛ ଅନିୟମିତତା ଇତ୍ୟାଦି ଏଯାବତ୍ କମିନାହିଁ ।  ରାଜ୍ୟରେ ରାଜ୍ୟବାସୀ ଅତିଷ୍ଠ ହୋଇପଡିଥିବା ପ୍ରତ୍ୟେକ କ୍ଷେତ୍ରରେ ସଂକ୍ରାମକ ରୋଗ ପରି ବ୍ୟାପକ ଦୁର୍ନୀତି ଓ ପ୍ରକୃତ ବିକାଶର ସଂଜ୍ଞା ରାଜ୍ୟବାସୀ ତର୍ଜମା କରନ୍ତୁ  ! କାହାକୁ ଧରି ସରକାର ଏସବୁ ଘୋଷଣା କରୁଛନ୍ତି ଓ  ଏସବୁ ଅପେକ୍ଷା ତୃଣମୂଳସ୍ତରରୁ ପ୍ରତ୍ୟେକ ବିଭାଗର ସ୍ବଚ୍ଛତା ଲୋକଙ୍କ ନିମନ୍ତେ ଅସଲ କାମ୍ୟ ହୋଇଥିବାବେଳେ , ସରକାର କାହାକୁ ନେଇ ଏସବୁର ସଂସ୍କାର କରିବାକୁ ଆଶା ବାନ୍ଧିଛନ୍ତି  ବୋଲି ଜନସାଧାରଣ ପ୍ରଶ୍ନ କରୁଛନ୍ତି  ।