ଗୃହରେ ବିଜେପିବିଧାୟକଙ୍କ ଦାବିକୁ ସରକାର ଗ୍ରହଣ କରିବେ ତ  !

ଖାଲି ଏତିକି ନା ଆହୁରି ଅଛି  ?

ଭୁବନେଶ୍ବର  :  ଚଳିତ ବିଧାନସଭାର ମୌସୁମୀ ଅଧିବେଶନର ଗୃହରେ ବିଜେପି ବିଧାୟକ ଜୟନାରାୟଣ ମିଶ୍ରଙ୍କ ରାଜ୍ୟରେ ଗତ ବିଜେଡି ସରକାର ଅମଳରେ ଘଟିଥିବା କେତୋଟି ବହୁଚର୍ଚ୍ଚିତ ହାଇପ୍ରୋଫାଇଲ୍ ହତ୍ୟାକାଣ୍ଡ ଗୁଡିକର ତଦନ୍ତ ଦାୟିତ୍ୱ ସିବିଆଇକୁ ଦିଆଯିବାକୁ ଦାବି ଲୋକଙ୍କ ମଧ୍ୟରେ ଆଲୋଡନ ସୃଷ୍ଟି କରିଛି ।  ଶ୍ରୀ ମିଶ୍ର  ଶୂନ୍ୟକାଳରେ ଏଇ ଦାବି କରି କହିଛନ୍ତି ଯେ , ଏବେ ବି ସ୍ବାମୀ ଲକ୍ଷ୍ମଣାନନ୍ଦ , ନବ ଦାସ ଓ ମମିତା ମେହେର ହତ୍ୟାକାଣ୍ଡର ତଦନ୍ତ ସମ୍ପର୍କରେ ଲୋକଙ୍କର ସନ୍ଦେହ ରହିଛି ।

କହିବାବାହୁଲ୍ୟ , ପ୍ରାୟତଃ ପୂର୍ବତନ ବିଧାନସଭା ବିରୋଧୀଦଳ ନେତା  ସମ୍ବଲପୁରର ଏଇ ଭାଜପା ବିଧାୟକ ଜଣଙ୍କ ସର୍ବଦା ତାଙ୍କର ବିବାଦୀୟ କାର୍ଯ୍ୟକଳାପ ଓ ଅପରିଣାମଦର୍ଶୀ ବିବୃତି ଯୋଗୁଁ ଚର୍ଚ୍ଚାରେ ରହିଆସୁଥିଲେ ହେଁ , ସେ ତାଙ୍କର ରୋକ୍ ଠୋକ୍ ନିର୍ଭୀକ ବ୍ୟକ୍ତିଗତ ମତାମତ ପାଇଁ କାହା ସହ କୌଣସି।ସାଲିସ୍ କରନ୍ତି ନାହିଁ । ଏପରିକି କିଛିଦିନତଳେ ସେ ତାଙ୍କରି ସରକାରର ଖୋଦ୍ ମୁଖ୍ୟମନ୍ତ୍ରୀଙ୍କ ହାଇକୋର୍ଟ ବେଞ୍ଚ ପ୍ରସଙ୍ଗରେ ମଧ୍ୟ ସହମତ ହୋଇ ନଥିଲେ !  ତେଣୁ ରାଜ୍ୟର ବା ଲୋକଙ୍କ ସ୍ବାର୍ଥ ସକାଶେ ତାଙ୍କର ଏଭଳି ଶାଣିତ ବକ୍ତବ୍ଯକୁ ଜନସାଧାରଣ ଗ୍ରହଣ କରିଥା’ନ୍ତି । 

ଏଣୁ ଏବେ ତାଙ୍କର ଗୃହର ଶୂନ୍ୟକାଳର ଏଇ ଦାବିର କେତେଦୂର ଯଥାର୍ଥତା ରହିଛି , ସରକାର ଚିନ୍ତା କରିବା ଆବଶ୍ୟକ । ଏହାପୂର୍ବରୁ ରାଜ୍ୟ ଆଇନମନ୍ତ୍ରୀ ପୃଥ୍ବୀରାଜ ହରିଚନ୍ଦନ ମଧ୍ୟ ଏକ ଆନ୍ତର୍ଜାତୀୟ ସମ୍ବାଦପତ୍ରକୁ ଦେଇଥିବା ବିବୃତିରେ ଗତ ସରକାର ଅମଳର ୨୪ ବର୍ଷର ସବୁ ଅପରାଧର ପୁନଃତଦନ୍ତ କରାଯିବ ବୋଲି  ପ୍ରକାଶ ପାଇଥିଲା ।

ତେବେ ଶ୍ରୀ ମିଶ୍ର ଉଠାଇଥିବା ଗତ ବିଜେଡିସରକାର ଅମଳର ଏଇ ତିନୋଟି ବହୁଚର୍ଚ୍ଚିତ ସାଇପ୍ରୋଫାଇଲ୍ ହତ୍ୟାକାଣ୍ଡ ନା ଆହୁରି ଅଛି , ଏ ନେଇ ସ୍ପଷ୍ଟ କରାଯିବାକୁ ଲୋକେ ଦାବି କରିଛନ୍ତି । ଏଥିମଧ୍ୟରେ ଟିଟିଲାଗଡ ବିଜେଡିର ବାହୁବଳୀନେତା ଅଭି ସାହୁ ହତ୍ୟାକାଣ୍ଡ ,  ନିକଟରେ ଏକ ସମ୍ବାଦପତ୍ରରେ ପ୍ରକାଶ ପାଇଥିବା ‘ ସ୍ନିଗ୍ଧାରାଣୀ ମୃତ୍ୟୁ ରହସ୍ୟ (ଯାହାର ତଦନ୍ତ ତତ୍କାଳୀନ ବିଧାୟକ ତଥା ଏବର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଦାବି କରିଥିଲେ ), ଏଇ ଖବରର ସୋସିଆଲ୍ ମିଡ଼ିଆ ପୋଷ୍ଟ୍ ରେ ଲୋକେ ଆଉ ଏକ ସମ୍ବେଦନଶୀଳ ପ୍ରସଙ୍ଗ ‘ ଅର୍ଚ୍ଚନା ନାଗ ‘ ସେକ୍ସସ୍କାଣ୍ଡାଲ୍ ମାମଲା , ଅଦ୍ୟାବଧି ସରଗରମ ପାଟଣାଗଡ ପାର୍ଶଲ୍ ବୋମା ଡବଲ ହତ୍ୟାକାଣ୍ଡର ତଦନ୍ତ , ପଡୋଶୀ ଝାଡଖଣ୍ଡରେ ରକ୍ଷିତା ମାଆଝିଅଙ୍କୁ  ହତ୍ୟାକରି ରାସ୍ତାରେ ଫିଙ୍ଗିଦେଇ ଗାଡିମଡାଇ ଦେଇଥିବା ଅଭିଯୋଗରେ ସେଠାକାର ପୁଲିସ୍ ଦ୍ବାରା ଗିରଫ ହୋଇ ପରେ ଜେଲରୁ ବାହାରିଥିବା ବ୍ରଜରାଜନଗରର ପୂର୍ବତନ ବିଧାୟକ ଅନୁପ ସାଏଙ୍କ ସମ୍ପୃକ୍ତିର ଉପଯୁକ୍ତ ଦ୍ବୈତତଦନ୍ତ , ତତ୍କାଳୀନ ବିଜେଡି ବିଧାୟକଙ୍କ ଆଡକୁ ଆଙ୍ଗୁଠି ଉଠାଯାଇଥିବା ପାଟଣାଗଡ ବ୍ଲକ୍ ର ଜେଇ ସୁରେଶ ସାହୁ ହତ୍ୟାକାଣ୍ଡ , କଣ୍ଟାବାଞ୍ଜି (  ଧାମନଡଙ୍ଗା ) ଉପ- କାରାଗାରରେ ମମିତା ମେହେର ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁର ମୃତ୍ୟୁ ରହସ୍ୟ ଓ ଆହୁରି ଅନେକ ଚାଞ୍ଚଲ୍ୟକର ନରହତ୍ୟା ମାମଲା ରହିଛି । ଯଦିଓ ଉପରୋକ୍ତ ମାମଲାଗୁଡିକର ଅଧାପନ୍ତରିଆ ତଦନ୍ତରେ କେତେକ ଅଭିଯୁକ୍ତ ଗିରଫ ହୋଇ ଜେଲ୍ ହାଜତରେ ଢୁକିଛନ୍ତି , ତଥାପି ଗତ ସରକାରଙ୍କ ଜିଦ୍  ଓ ପକ୍ଷପାତ ଯୋଗୁଁ  କେତେକ ବଡବଡିଆଙ୍କୁ ଛାଡିଦିଆଯାଇଥିଲା । ଏପରିକି କେବଳ ବିଜେଡି ଦଳର ନୁହେଁ , କଂଗ୍ରେସ ଓ ଭାଜପାର କେତେକ ତୁଙ୍ଗନେତାଙ୍କ ଢିଲାରେ ବି ଲାଲ୍ -ଗୋଲାପି ଛିଟା ବାଜିଥିଲା  !

ସେ ଯା’ ହେଉ , ସତରେ ସେସବୁ ବହୁଚର୍ଚ୍ଚିତ ନରହତ୍ୟାମାମଲା ବା ସେକ୍ସସ୍କାଣ୍ଡାଲ୍ ର ଆଉଥରେ ପୂର୍ଣ୍ଣାଙ୍ଗ କେନ୍ଦ୍ରୀୟ ଏଜେନ୍ସି ମାଧ୍ୟମରେ ପୁନଃତଦନ୍ତ ହେବ କି  ?  ଗୃହରେ ସରକାରୀଦଳର ଜଣେ ବିଧାୟକଙ୍କ ଏଭଳି ସିବିଆଇ ତଦନ୍ତର ଅର୍ଥ ହେଲା , ନିଜ ସରକାରଙ୍କ ଗୃହବିଭାଗର ତଦନ୍ତ ଉପରେ ତାଙ୍କର ଆସ୍ଥା ନାହିଁ  ?

ଦେଖାଯାଉ , ବିଧାନସଭା ଭଳି ପବିତ୍ରଗୃହରେ ବି ଏସବୁ ବୟାନବାଜୀ ବନାମ ବକ୍ ବାଜୀ ( ? ) ର ପରିଣତି କୁଆଡକୁ ଯାଉଛି  ?