ପ୍ଲାଷ୍ଟିକ୍ ବୋତଲରେ ପେଟ୍ରୋଲ୍ ନିଷିଦ୍ଧ ନିୟମ

ଭୁବନେଶ୍ବର : ବହୁଚର୍ଚ୍ଚିତ ବାଲେଶ୍ବର ଫକୀରମୋହନ ମହାବିଦ୍ୟାଳୟର ଛାତ୍ରୀ ଆତ୍ମଦାହ ଘଟଣା ପରେ ରାଜ୍ୟ ସରକାରଙ୍କ ପ୍ଲାଷ୍ଟିକ୍ ବୋତଲରେ ପେଟ୍ରୋଲ୍ ବିକ୍ରି କଟକଣାକୁ ନେଇ ରାଜ୍ୟବ୍ୟାପି ମୃଦୁ ମିଶ୍ରପ୍ରତିକ୍ରିୟା ସୃଷ୍ଟି ହୋଇଛି । କେତେକ ଏହାକୁ ସମାଲୋଚନା ପ୍ରକାଶ କରି କଟାକ୍ଷ କରିଛନ୍ତି ଯେ ଏହା ଏକ ଦନ୍ତହୀନ ସରକାରୀ ଆଇନ୍ ଓ ‘ କାନ ନେଇଗଲା କୁଆ ‘ ଭଳି ଏହା ଏକ ଅଜବ୍ ନିୟମ । ଯଦିଓ ୧୯୩୪ ଇଂରେଜଶାସନ ଅମଳରୁ ପେଟ୍ରୋଲ୍ ଭଳି ଦାହ୍ୟ ତରଳ ପଦାର୍ଥକୁ ଏଭଳି ଖୁଚୁରା ବିକ୍ରି ଇତ୍ୟାଦି ବିରୋଧରେ ପେଟ୍ରୋଲିୟମ ଆକ୍ଟ ର ନିଷେଧ କଟକଣା ରହିଛି । ହୁଏତ ସେତେବେଳେ ପ୍ଲାଷ୍ଟିକ୍ ବୋତଲର ପ୍ରଚଳନ ନ ଥିବାରୁ ସେତେବେଳର ନିୟମ ଅନୁସାରେ ଏବେ ଟିଣ ବା କାଚ ବୋତଲରେ ଏହା ନିଆଯାଇପାରିବ ବୋଲି ବିକଳ୍ପ ବାହାର କରାଯାଇଛି । ଛତୁଫୁଟିଲା ପରି ରାସ୍ତାକଡରେ ଏଭଳି ପ୍ଲାଷ୍ଟିକ୍ ବୋତଲରେ ପେଟ୍ରୋଲ ବିକ୍ରି ନିଷେଧ ନିୟମ ଘୋଷଣା କରି ସରକାର ଏକ କଟକଣା ଜାରୀ କରିଥିବା ନିଶ୍ଚିତ ଭାବରେ ସ୍ବାଗତଯୋଗ୍ୟ । ଅପରତଃ ପେଟ୍ରୋଲ ଚାଳିତ ଅନ୍ଯାନ୍ଯ ଅଚଳ ମୋଟର ବା ଯନ୍ତ୍ରପାତି ନିମନ୍ତେ ପେଟ୍ରୋଲପମ୍ପରୁ ଏହା କିପରି ନିଆଯାଇପାରିବ, ଏଥିରେ ପ୍ଲାଷ୍ଟିକ୍ ବୋତଲ ଏକମାତ୍ର ବିକଳ୍ପ ନୁହେଁ ।

ସେ ଯାହାହେଉ, ଜଣେ ନିର୍ଯାତୀତା କଲେଜଛାତ୍ରୀଙ୍କ ଆତ୍ମଦାହ ରୋକିବାକୁ ସରକାରଙ୍କ ଉର୍ବର ମସ୍ତିଷ୍କରୁ ଏଇ ବୁଦ୍ଧିଟି କେତେଦୂର ଉପଯୋଗୀ ହୋଇପାରିବ, ବିଚାରସାପେକ୍ଷ । ତେବେ ରାଜନୈତିକ ବିରୋଧର ସୁରକ୍ଷା କ୍ଷେତ୍ରରେ ଏହା ଏକ ହାସାସ୍ପଦ ପଦକ୍ଷେପ ବୋଲି କେତେକ ମହଲରେ ସମାଲୋଚନା ପ୍ରକାଶ ପାଇଛି ।