କେବେ ହେବ ଓଡିଆଅସ୍ମିତାର କର୍ମଶାଳା  ?

ଭୁବନେଶ୍ବର  :  ଯେଉଁ  ସଂଜୀବନୀ ଶବ୍ଦ  ‘ ଓଡିଆଅସ୍ମିତା ‘ ପାଇଁ ଗତ ୨୪ ବର୍ଷର ଏକଛତ୍ରବାଦୀ ବିଜେଡି ଶାସନର ବିଲୟ ଘଟିଲା ଓ ରାଜ୍ୟରେ ନୂତନ ଏକ ଯାଦୁକରୀ ମୋଦୀ ବନାମ ଏଇ ଲହରରେ ଭାଜପା ସରକାର ଆସିଗଲା ; ସେଇ ତଥାକଥିତ ‘ ଓଡିଆଅସ୍ମିତା ‘ ଶବ୍ଦଟିର ଯିଏ ଉଦ୍ଭାଭନକର୍ତ୍ତା ହୋଇଥାଆନ୍ତୁ ନା କାହିଁକି , ଏଯାବତ୍ ଯେ ଓଡିଆଲୋକେ ଏଇ ‘ଓଡିଆଅସ୍ମିତା ‘ ନାମକ ଦୁର୍ବୋଧ୍ଯ ଶବ୍ଦଟିକୁ ସମ୍ପୂର୍ଣ୍ଣତଃ ବୁଝିପାରି ନାହାଁନ୍ତି , ଏହା ଅସତ୍ୟ ନୁହେଁ ।

ତେବେ କେତେକଙ୍କ ମତରେ ଦୀର୍ଘବର୍ଷକାଳ ଓଡିଶାରେ ଓଡିଆଭାଷା କହିବୋଲିପଢି ପାରୁ ନଥିବା ଜଣେ ବିଲାତିମଡେଲର ମୁଖ୍ୟମନ୍ତ୍ରୀ ଓ ଜଣେ ଅଣଓଡିଆ ଅମଲାଙ୍କ ଅତିଷ୍ଠ ଏକାଙ୍ଗ ଆଧିପତ୍ୟ ବିରୁଦ୍ଧରେ ଯେଉଁ ଆଞ୍ଚଳିକଭାବନାଟିର ଉଦ୍ରେକ ହେଲା , ତାହା ହିଁ କୁଆଡେ ଓଡିଆଅସ୍ମିତା  ! ସେ ଯାହାହେଉ , ଏବେ ଏଇ ମୌଳିକ ଜାତୀୟଭାବନାଟିର ସଂରକ୍ଷଣ ଜରୁରୀ  ଏବଂ ଏଥିପାଇଁ ଓଡିଆ ଭାଷା , ସାହିତ୍ୟ ଓ ସଂସ୍କୃତି ବିଭାଗର ଓଡିଶା ସାହିତ୍ୟ ଏକାଡେମୀରେ ଏହାର ଅବିରତ କର୍ମଶାଳା ହେବା ଆବଶ୍ୟକ । ଅବଶ୍ୟ ନୂତନ ସରକାର ଓଡିଶାବାସୀଙ୍କର ଏଇ ଅବବୋଧ ବା ପ୍ରସ୍ତାବ ପ୍ରତି କେତେ ଗୁରୁତ୍ବ ଦେବେ , ଏହା ତାଙ୍କ ଉପରେ ନିର୍ଭର କରେ  !

କିନ୍ତୁ ଏବେ ଓଡିଆ ଭାଷା , ସାହିତ୍ୟ ଓ ସଂସ୍କୃତିର ଯେଭଳି ଅବନତି ଘଟିଚାଲିଛି , ଏଥିରେ ଓଡିଆ ସାହିତ୍ୟ ଏକାଡେମୀର ଯଥେଷ୍ଟ ଭୂମିକା ଥିବାବେଳେ , ହୁଏତ ସରକାର ଶାଳଗ୍ରାମ ତୁଲ୍ୟ ଏଇ ବିଶେଷ ସଂସ୍ଥାଟିକୁ ମାଙ୍କଡ଼ମାନଙ୍କ ହାତରେ ନଚାଇବାକୁ ଛାଡିଦେଇ ନିଶ୍ଚିନ୍ତ ରହିଯାଇଛନ୍ତି  ? ସଂପ୍ରତି ଓଡିଶା ସାହିତ୍ୟ ଏକାଡେମୀ ସଂସ୍ଥାଟି କେତେକ ଚାଟୁକାର ତଥାକଥିତ ଲେଖକ ଓ ମନ୍ଦକବି- ଯଶପ୍ରାର୍ଥୀଙ୍କର ଚରାଭୂଇଁ ପାଲଟିଯାଇଛି । ହୁଏତ ସରକାର ପ୍ରକୃତ ସାହିତ୍ୟ ଓ ପ୍ରକୃତ ଲେଖକଙ୍କର ସଂଜ୍ଞା ଜାଣନ୍ତିନାହିଁ । ତେଣୁ ବିଗତ କେତେ ଦଶନ୍ଧି ହେଲା ଦେଶର ପ୍ରଥମ ଭାଷାଭିତ୍ତିକ ରାଜ୍ୟର ଅସଲ ମୌଳିକ ଓଡିଆଅସ୍ମିତା ଅବଲୁପ୍ତ ହୋଇ ରହିଥିଲା । ଶେଷରେ ଏହା କାଳର ଆହ୍ବାନକ୍ରମେ ଭୂଇଁଫଟେଇ ବାହାରି ପଡିଲା ।

ନୂଆସରକାରଙ୍କର ପ୍ରଥମ କର୍ତ୍ତବ୍ୟ ହେଲା , ଓଡିଆ ସାହିତ୍ୟ ଏକାଡେମୀକୁ ସଜାଡିବା । ଏଇ ବିଭାଗରେ ପୂର୍ବରୁ ରହି ଯାବତୀୟ କେଳେଙ୍କାରୀରେ ଜଡିତ ରହି ଏକାଡେମୀର ଅସଲ ଉଦ୍ଦେଶ୍ୟକୁ ବାଟବଣା କରି ନିକୃଷ୍ଟସ୍ବାର୍ଥସାଧନ କରି ତଡାଖାଇଥିବା କେତେକ ଶିଖିମନାଇ ଅମଲାଙ୍କର ପୁନଃଆଗମନକୁ ପ୍ରତିହତ କରିବା ସହିତ ବିଧିମତେ ଏକାଡେମୀକୁ ସୁପରିଚାଳନା ନିମନ୍ତେ ଯୋଗ୍ୟ ପ୍ରତିଭାବାନ୍ ନିଷ୍ଠାପର ସଭ୍ୟ / ସଭ୍ୟା , କାର୍ଯ୍ୟକର୍ତ୍ତା , କର୍ତ୍ତୃପକ୍ଷ ଓ ପଦାଧିକାରୀ ଚୟନ କରିବା । ଗତଥରମାନଙ୍କ ପରି ବ୍ୟାପକ ଅବ୍ୟବସ୍ଥା , ଅନିୟମିତତା ଓ ଅଭିଯୋଗର ବିବାଦରୁ ଏହାକୁ ମୁକ୍ତ ରଖିବା । କେବଳ ନାମବାଚକ ଭାବରେ ନୁହେଁ , ଏଠାରେ ପ୍ରକୃତ ଜ୍ଞାନୀ ଗୁଣୀ ପ୍ରତିଭାବାନଙ୍କୁ ଦାୟିତ୍ୱ ଦେବା ।

ଗତଥର ଗଳିବାଟେ ଢୁକି ସଭାପତି ଆଦି ଆସନ ହାତେଇ ଗୋଟେ ଜାତିର ସ୍ବାଭିମାନ ଓ ଦାୟିତ୍ୱକୁ କିଛିବର୍ଷ ପଛକୁ ଠେଲିଦେବା ଅବାଞ୍ଛିତ ତଥାକଥିତ କବିଲେଖକମାନଙ୍କର ଦୌରାତ୍ମ୍ୟରୁ ଏଇ ପବିତ୍ର ଭାଷାସାହିତ୍ୟର ସାରସ୍ବତ ପୀଠ ଉତ୍କଳଜନନୀଙ୍କର ନିଷ୍ଠାପର ଉପାସନା ଜାରୀରଖିବା । ସତରେ ଏଥର ଓଡିଆଓଡିଆ ଅସ୍ମିତାର ଦ୍ବାହିଦେଇ କ୍ଷମତାସୀନ ହୋଇଥିବା ନୂତନ ମୋହନ ସରକାର ଏଥିପ୍ରତି ସଚେତନ ଅଛନ୍ତି  କି  ?

କେବେ ହେବ ଓଡିଶା ସାହିତ୍ୟ ଏକାଡେମୀର ଖାଲିପଡିଥିବା ସଭାପତି , ଉପ- ସଭାପତି , ସମ୍ପାଦକ ଓ ଅନ୍ୟାନ୍ୟ କର୍ମକର୍ତ୍ତାଙ୍କ ଚୟନ  ?  କେବେ ଦିଆଯିବ ବର୍ଷ ବର୍ଷ ଧରି ବାକିପଡିଥିବା ପୁରସ୍କାର ପ୍ରଦାନ  ? କେବଠୁଁ ଆରମ୍ଭ ହେବ ଓଡିଶାରେ ଓଡିଆ ଅସ୍ମିତାର କର୍ମଶାଳା , ଏହା ଉପରେ ସମସ୍ତ ଓଡିଶାବାସୀଙ୍କର ଦୃଷ୍ଟି ନିବଦ୍ଧ ରହିଛି ।  ଏଥର ଏଇ ସଂସ୍ଥାର ସଂସ୍କାର ହେବ ନା ସେଇ ପୁରୁଣା ଢାଞ୍ଚାରେ ଚାଲିବ ସବୁ ? ଏହାର ଉତ୍ତର ସରକାର ଦେବେ କି  ?