ତରଭା  :  ସୁବର୍ଣ୍ଣପୁର ଜିଲ୍ଲାର ତରଭା ଅଞ୍ଚଳରେ Runl ve ନାମକ ଏକ ବିଦେଶୀ ଆପ୍ ଅନ୍ ଲାଇନ୍ ଇନ୍ ଭେଷ୍ଟମେଣ୍ଟ୍ ଜରିଆରେ ଲୋକଙ୍କଠାରୁ ଏଯାବତ୍ ୨ କୋଟିରୁ ଉର୍ଦ୍ଧ୍ବ ଟଙ୍କା ହଡପ କରିଥିବା ତରଭାର ଜଣେ ଯୁବକଙ୍କ ବିରୋଧରେ ଏକ ଏତଲା ଦିଆଯାଇଛି ।  ତରଭାର ଶ୍ରୀ କୁମାର ମହନ୍ତ ନାମକ ଜଣେ ସାମ୍ବାଦିକ ତଥା ସମାଜସେବୀ ଯୁବକଙ୍କ ପକ୍ଷରୁ ଗତକାଲି ସ୍ଥାନୀୟ ତରଭା ଥାନାରେ ଏ ସମ୍ପର୍କରେ ଏକ ଲିଖିତ ଏତଲା ଦିଆଯାଇଛି । ଏହା ସହିତ ଅନ୍ ଲାଇନ୍ ରେ ଭାରତ ସରକାରଙ୍କ ନ୍ୟାସ୍ ନାଲ୍ ସେଲ୍ , ନ୍ୟାସନାଲ୍ ସାଇବର କ୍ରାଇମ୍ ରିପୋର୍ଟିଂ ପୋର୍ଟାଲ୍ , ନୂଆଦିଲ୍ଲୀକୁ ମଧ୍ୟ ଏକ ପିଟିସନ୍ ପଠାଇଥିବା ପ୍ରକାଶ ।

ଅଭିଯୋଗ ଅନୁଯାୟୀ , ତରଭାର ସଂସିତ ସାହୁ ନାମକ ଜଣେ ଯୁବକ ଏହି ଅନ୍ ଲାଇନ୍ ଆପ୍ ର ସ୍ଥାନୀୟ କମିଶନ୍ ଏଜେଣ୍ଟ ହୋଇ ଏକ ହ୍ବାଟ୍ସଅପ୍ ଗଠନ କରି ଏହା ଜରିଆରେ ଲୋକଙ୍କୁ ଜମା ବଢାଇବାର ମିଥ୍ୟା ପ୍ରତିଶ୍ରୁତି ଦେଇ ପ୍ରାୟ ଦୁଇକୋଟିରୁ ଉର୍ଦ୍ଧ୍ବଟଙ୍କା ହଡପ କରିନେଇଛି । ଗତ ୨୫ । ୮ । ୨୦୨୪ ତାରିଖରେ ତାଙ୍କଠାରୁ ମଧ୍ୟ ୨୨୫୦୦ ଟଙ୍କା ନେଇଥିବା ସେ ଉଲ୍ଲେଖ କରିଛନ୍ତି । ଅଭିଯୁକ୍ତ ଯୁବକ ଜଣକ ଏହି ଠକକମ୍ପାନୀର ପ୍ରଚାରପ୍ରସାର କରିବାକୁ ତାଙ୍କ ତରଭା ସ୍ଥିତ ନାରାୟଣ ମୁରଲୀ କଲ୍ୟାଣ ମଣ୍ଡପରେ ଗ୍ରାହକ ଯୋଗାଡ କରିବାକୁ ଏକ ଭୋଜିଭାତର ଆୟୋଜନ କରି ବୈଠକ କରିଥିଲା । ଏ ସମ୍ପର୍କରେ ଏତଲାକାରୀଙ୍କ ପକ୍ଷରୁ ତତ୍ ସମ୍ପର୍କୀୟ ତଥ୍ୟପ୍ରମାଣର ନକଲ ଫଟୋକପି ମଧ୍ୟ ସଂଲଗ୍ନ କରାଯାଇଛି ।

ତେବେ ଗତ ୧୪ ତାରିଖରେ ସେ ପ୍ରଥମେ ଦେଇଥିବା ଏ ସମ୍ପର୍କରେ ଏତଲାକୁ ଥାନାଧିକାରିଣୀ ଅନୀତା କିଡୋ ମାମଲା ପଞ୍ଜିକରଣ କରିବାକୁ ୨ ଦିନ ସମୟ ମାଗିଥିବା , ଏହା ତାଙ୍କ ତଦନ୍ତ ପରିସରଭୁକ୍ତ ହେଉ ନଥିବାରୁ ଇଓ ଡବ୍ଲୁ କୁ  ଦେବାକୁ ପରାମର୍ଶ ଦେଇ ଥାନାରେ ମାମଲାଟି ଋଜୁ କରି ନଥିବା ସହ ଅଭିଯୋଗକାରୀଙ୍କୁ ‘ କିପରି ଲୋକମାନଙ୍କର ଟଙ୍କା ମିଳିବ , ସେ ପ୍ରତି ଦୃଷ୍ଟିଦିଆଯିବ ‘ ଇତ୍ୟାଦି ଲଣ୍ଠନ ଦେଖାଇ ଟାଳୁଥିବା ପ୍ରକାଶ ।

ଉଲ୍ଲେଖନୀୟ ଯେ , ସ୍ବିଜରଲାଣ୍ଡ୍ ର ଏ ଆଇ ଆପ୍ ର ଏହି କମ୍ପାନୀ ଏହା ପୂର୍ବରୁ  ପୁରୀ , ବୌଦ୍ଧ , ସୋନପୁର ଇତ୍ୟାଦି ସ୍ଥାନରେ ମଧ୍ୟ ଏହିପରି Runlve କମ୍ପାନୀ ଠକେଇ କରିଥିବା ଓ ପୁଲିସ୍ ତଦନ୍ତ କରୁଥିବା ଗଣମାଧ୍ୟମରେ ଖବର ପ୍ରକାଶ ପାଇଥିଲା । ଆମ ‘ଦୃଷ୍ଟିପାତ ନିଉଜ୍ ପୋର୍ଟାଲ୍ ‘ ରେ ମଧ୍ୟ ସୋନପୁର ଓ ବଲାଙ୍ଗୀର ଜିଲ୍ଲାର ଏ ଭଳି ଠକେଇ ସମ୍ପର୍କରେ ଏକ ଅନୁସନ୍ଧାନମୂଳକ ବିସ୍ତୃତ ରିପୋର୍ଟ ପ୍ରକାଶ ପାଇଛି।

ଆହୁରି ମଧ୍ୟ କିଛିଦିନ ତଳେ ଏହି ଥାନାନ୍ତର୍ଗତ କମସରା ପେକ୍ସରେ ଫେକ୍ ଭେଣ୍ଡରର ଲକ୍ଷାଧିକ ଟଙ୍କା ହଡପ କରି ଅନ୍ ଲାଇନ୍ ଟ୍ରେଡିଂ ବେପାରରେ ଫସିଥିବା ଜଣେ ଡିଇଓ , ଗୋ- ଆପ୍ ରେ ଫସି ଗତବର୍ଷଠାରୁ ବ୍ୟାଙ୍କରୁ ପର୍ଯ୍ୟାୟକ୍ରମେ ମୋଟ ୧ କୋଟି ୧୯ ଲକ୍ଷଟଙ୍କା ହଡପ କରି ଫେରାର ଥିବା ସୋନପୁର ଭିଜିଲାନ୍ସ ତଦନ୍ତାଧୀନ ସୋନପୁର ଉଠାଜଳସେଚନ ନିଗମର ଜଣେ ସହକାରୀ ହିସାବ ରକ୍ଷକ ବଳରାମ ମେହେର ଓ ଗତ ୨ ତାରିଖ ରାତିରେ ସୋନପୁର ମହାନଦୀ ସେତୁ ଉପରେ ନିଜର ଆପାଚି ବାଇକ୍ , ପର୍ସ , ଚପଲ ଇତ୍ୟାଦି ରଖିଦେଇ  ଭରାନଈକି ଡେଇଁପଡି ଆତ୍ମହତ୍ୟା ସନ୍ଦେହ କରାଯାଉଛି ।

ଅଦ୍ୟାବଧି ନିଖୋଜ ବଲାଙ୍ଗୀରରେ ରହୁଥିବା ଏହି ଓଟିଭି ତରଙ୍ଗ ଚ୍ୟାନେଲ୍ ର ମାର୍କେଟିଂ ଏଜକ୍ୟୁଟିଭ୍ କୁଲଦୀପ ପାଢୀ ନାମକ ମେଣ୍ଡାଗ୍ରାମର ଜଣେ ଯୁବକ ଏଇଭଳି ଲକ୍ଷାଧିକ ଟଙ୍କା ଫସାଇ ବୁଡିଯାଇଥିବା  ଚର୍ଚ୍ଚା ହେଉଛି । ଏସବୁ ଘଟଣାମୂଳରେ ଏଇଭଳି ଅନ୍ ଲାଇନ୍ ଜୁଆଖେଳ ରହିଥିବା ସନ୍ଦେହ କରାଯାଉଛି ।

ତେଣୁ ପୁଲିସ୍ ଏଭଳି ସମ୍ବେଦନଶୀଳ ମାମଲାକୁ ଦାୟିତ୍ୱ ଖସାଇ କାଳକ୍ଷେପଣ କରୁଥିବା ଅଭିଯୋଗ ପ୍ରତି ସରକାର ଦୃଷ୍ଟିଦିଅନ୍ତୁ ବୋଲି ଜନସାଧାରଣଙ୍କ ପକ୍ଷରୁ ଦାବି କରାଯାଇଛି ।