ସମସ୍ୟାର ନିରାକରଣରେ ସରକାରଙ୍କ ଅସାମର୍ଥ୍ୟ  ?

ଭୁବନେଶ୍ବର  : ଏବେ ଚର୍ଚ୍ଚା ଜୋର୍ ଧରିଛି କମ୍ପ୍ୟୁଟର ଦୋକାନ ବା ସାଇବର କେଫେରେ ନିଯୁକ୍ତି ଦୁର୍ନୀତିର ଅଭିଯୋଗ । ରାଜଧାନୀ ଭୁବନେଶ୍ଵର ହେଉ ବା ବୌଦ୍ଧଆଦି ଜିଲ୍ଲାର ଦହ୍ୟା ; ସଂପ୍ରତି ଚାଲିଥିବା ଆର୍ ଆଇ , ଏ ଆର୍ ଆଇ ଓ ଅମୀନ୍ ଚାକିରୀ ପାଇଁ ଅନ୍ ଲାଇନ୍ ପରୀକ୍ଷାରେ ଜାଲିଆତି , ଠକେଇ ଓ ଟଙ୍କା କାରବାର ହୋଇ ନିଯୁକ୍ତି ବିକ୍ରିର ଗୁରୁତର ଅଭିଯୋଗ ପ୍ରକାଶ ପାଇଛି । ଏହା ପୂର୍ବରୁ ଓଏସ୍ ଏସ୍ ଏସ୍ ସି ର ଫରେଷ୍ଟର ଇତ୍ୟାଦିର ପରୀକ୍ଷାରେ କମ୍ପ୍ୟୁଟର ମାଉସ୍ ହଲାଇଦେଲେ ପାସ୍ ବୋଲି ଅଭିଯୋଗ ପ୍ରକାଶ ପାଇଥିଲା । ତେବେ କେବଳ ଏଇସବୁ ଚାକିରୀ ପାଇଁ ପରୀକ୍ଷାରେ ନୁହେଁ , ଅନେକଦିନରୁ ଓଡିଶା ସମେତ ଦେଶର ଅନ୍ୟାନ୍ୟ ରାଜ୍ୟରେ ମଧ୍ୟ ଏଭଳି ଅନ୍ ଲାଇନ୍ ଏକ୍ ଜାମ୍ ରେ ଅନିୟମିତତାର ଅଭିଯୋଗ ହୋଇଆସୁଛି ।  କାରଣ ସ୍ବରୂପ  କୁହାଯାଉଛି ଯେ ସରକାର ଏତେ ସଂଖ୍ୟକ ଚାକିରୀ ଆଶାୟୀଙ୍କୁ ସମ୍ଭାଳି ନପାରି ଏସବୁ ସାଇବର ସଂସ୍ଥାଗୁଡିକୁ ଠିକା ଦେଇଥିବା ଓ ଏହାର ଠିକା ନେଇଥିବା ଏଯାବତ୍ ୪ ଟି କମ୍ପାନୀର ପୂର୍ବଦୁର୍ନୀତିରେ ଜଡିତ ଅଭିଯୋଗ ସତ୍ତ୍ୱେ  ଯଥେଷ୍ଟ ଭିତ୍ତିଭୂମି ନ ଥିବାରୁ ସରକାର ଏଭଳି ବିକଳ୍ପ ଉପାୟ ଅବଲମ୍ବନ କରୁଛନ୍ତି । ତେବେ ସେ ଯାହାହେଉ , ଏଥିରେ ଉଠୁଥିବା ଜାଲିଆତି , ଠକେଇ ଓ ଉତ୍କୋଚ କାରବାର ବିରୁଦ୍ଧରେ ସାଇବର ଅପରାଧ ରୋକିବାକୁ ସରକାର ପଦକ୍ଷେପ ନେବା ଆବଶ୍ୟକ । କିନ୍ତୁ ସରକାରଙ୍କ ଆଇ ଟି ବା ସାଇବର ବୈଷୟିକ ବିଭାଗଟି ଏ ଦିଗରେ ପଦକ୍ଷେପ ନେଉ ନଥିବା ବା  ଏଭଳି ଅପରାଧକୁ ଧରିବାକୁ ସମର୍ଥ ନଥିବା କୁହାଯାଉଛି ।

ସରକାରୀ ଚାକିରୀ ବା ଦୁର୍ନୀତିର ସୁଯୋଗ ରହିଥିବା ଆର ଆଇ , ଅମୀନ ଚାକିରୀ ପରି ଦୁଧିଆଳୀ ବିଭାଗର ଚାକିରୀ ପାଇଁ ଅଧିକ ଭିଡ ହେଉଛି ।  ଏଥକୁ ଆଉଟ୍ ସୋର୍ସିଂ ବା ଏଭଳି ଅ ନ୍ ଲା ଇ ନ୍  ଏ କ୍ ଜା ମ୍ ଏଭଳି ଅପରାଧ କରିବାକୁ ଦୁର୍ନୀତିଖୋର୍ ଓ ଅସାଧୁ ଦଲାଲ୍ ଙ୍କୁ ସୁଯୋଗ ଦେଉଛି । ସରକାରୀ ଅଧିକାରୀମାନେ ଏହି ପରୀକ୍ଷା ପରିଚାଳନା ଦାୟିତ୍ବରେ ରହୁଥିଲେ ହେଁ , ହୁଏତ ସେମାନେ ଅର୍ଥଲୋଭରେ ଏହି ଦୁର୍ନୀତିରେ ଜଡିତ ହୋଇପଡୁଛନ୍ତି ବା ଅଯଥାରେ ଲୋକଙ୍କ ଭୁଲ୍ ବୁଝାମଣାର ଶିକାର ହେଉଥିବା ଲକ୍ଷ୍ୟ କରାଯାଇଛି ।  ଏହାର ଫାଇଦା ନେଇ ଦଲାଲ୍ ମାନେ ଗୋଟିଏ ଗୋଟିଏ ଚାକିରୀ ପାଇଁ ଲକ୍ଷାଧିକ ଟଙ୍କାର ହାତସଫେଇ କରୁଛନ୍ତି ।

ଏହାର ପରିଚାଳନାର ସବୁଠାରୁ ବଡ ତ୍ରୁଟି ହେଉଛି , ଏକକାଳୀନ ଏତେସଂଖ୍ୟକ ପଦବୀ ପାଇଁ ପରୀକ୍ଷା କରାଇବା ଓ  ଉପଯୁକ୍ତ ସଂସ୍ଥାଗୁଡିକୁ ଏଥିପାଇଁ ଅନୁମତି ଦେଉ ନଥିବା । ଫଳତଃ  ରାସ୍ତାକଡର ଯା’ଚ୍ଛାତା ଦୋକାନ ,  ଷ୍ଟଲ୍ ବା କମ୍ପ୍ୟୁଟର କେନ୍ଦ୍ରରେ ଶହ ଶହ ବା ହଜାର ହଜାର ପ୍ରାର୍ଥୀଙ୍କର ପରୀକ୍ଷା ଚାଲିଛି । ଏଥିରେ ଲୋକଙ୍କ ସନ୍ଦେହ ସୃଷ୍ଟି ହେବା ସ୍ବାଭାବିକ୍ ।

ଏଣୁ ଅନ୍ତତଃ ଓଡିଶା ସରକାର ଏ ଦିଗରେ ଏହା ରୋକିବାକୁ ଉଚିତ୍ ପଦକ୍ଷେପ ନିଅନ୍ତୁ ବୋଲି ଜନସାଧାରଣଙ୍କ ପକ୍ଷରୁ ପରାମର୍ଶ ଦିଆଯାଉଛି ।