ରାଜନୈତିକ ଆକ୍ରୋଶ ନା ଟଙ୍କା ପାଇଁ ଡରାଣର ଚର୍ଚ୍ଚା  !

ବିନିକା  :  ଗତ ସପ୍ତାହରେ ସୁବର୍ଣ୍ଣପୁର ଜିଲ୍ଲାର ବିନିକା ଅଞ୍ଚଳର ୩ ଟି ରାଇସ୍ ମିଲ୍ ଉପରେ ସାଂସଦ ସଙ୍ଗୀତା ସିଂଦେଓ , ବୀରମହାରାଜପୁର ବିଧାୟକ ରଘୁନାଥ ଜଗଦଲା ଓ ସୁବର୍ଣ୍ଣପୁର ଜିଲ୍ଲାପାଳ ଅନ୍ୟା ଦାସଙ୍କୁ ନେଇ ଅଚାନକ ଚଢାଉ କରି ସିଲ୍ କରିବା ଘଟଣାରେ ଜିଲ୍ଲାର ରାଇସ୍ ମିଲ୍ ମାଲିକମାନଙ୍କ ଭିତରେ ଛନକା ପଶିଯାଇଛି । ଅବଶ୍ୟ ଇତିମଧ୍ୟରେ ଏହିମିଲ୍ ଗୁଡିକର ଷ୍ଟକ୍ ଯାଞ୍ଚ ସକାଶେ ପ୍ରଶାସନିକ ଅଧିକାରୀମାନଙ୍କୁ ନେଇ ଗଠିତ ଯାଞ୍ଚଦଳର ରିପୋର୍ଟ ପାଇବାପରେ ସେଗୁଡିକୁ ପୁଣି ଖୋଲିଦିଆଯାଇଥିବା ପ୍ରକାଶ ।  ତେବେ ଆଗରୁ କେବେ ଏଭଳି ଆକସ୍ମିକ କାର୍ଯ୍ୟାନୁଷ୍ଠାନ ନିଆଯାଇ ନଥିବାରୁ ଏଭଳି ଭାବରେ ଏକାଦିକ୍ରମେ ୩ଟି ମିଲ୍ ସିଲ୍ କରାଯିବା ଜିଲ୍ଲାରେ ଭିନ୍ନ ଚର୍ଚ୍ଚା ପ୍ରକାଶ ପାଇଛି ।

ପ୍ରକାଶ ଯେ , ଗତ ୩ ତାରିଖରେ ବିନିକା ଅଞ୍ଚଳର ଅରିଗାଁ’ର ଜୟଲକ୍ଷ୍ମୀ ରାଇସ୍ ମିଲ୍ , ଗଡଗଡବାହାଲର ବ୍ରଜଭୂମି ରାଇସ୍ ମିଲ୍ ଓ ପଦ୍ମନିତା ରାଇସ୍ ମିଲ୍ ଉପରେ ବଲାଙ୍ଗୀର ଲୋକସଭା ସାଂସଦ ସଙ୍ଗୀତା କୁମାରୀ ସିଂଦେଓ  ବୀରମହାରାଜପୁର  ଭାଜପା ବିଧାୟକ ରଘୁନାଥ ଜଗଦଲା ଓ ସୁବର୍ଣ୍ଣପୁର ଜିଲ୍ଲାପାଳ ଅନ୍ୟା ଦାସଙ୍କୁ ସାଙ୍ଗରେ ନେଇ ସନ୍ଧ୍ୟାସମୟରେ ଅଚାନକ ଚଢାଉ କରିଥିଲେ । ଏହା ସହିତ ଜିଲ୍ଲାପାଳ ତଥା ଜିଲ୍ଲା ମାଜିଷ୍ଟ୍ରେଟ୍ ଙ୍କ ନିର୍ଦ୍ଦେଶରେ ଏହି ମିଲ୍ ଗୁଡିକୁ ସିଲ୍ କରିଦିଆଯାଇଥିଲା  ଓ ସେ ବିନିକା ତହସିଲଦାରଙ୍କୁ ଏହି ମିଲ୍ ଗୁଡିକର ଷ୍ଟକ୍ ଯାଞ୍ଚ ନିମନ୍ତେ ନିର୍ଦ୍ଦେଶ ଦେଇଥିଲେ । ଦୁଇଦିନ ପରେ ପ୍ରଶାସନିକ ଅଧିକାରୀମାନଙ୍କ ଦ୍ବାରା ଗଠିତ ଯାଞ୍ଚକମିଟି ଏହି ମିଲ୍ ଗୁଡିକର ଷ୍ଟକ୍ ଯାଞ୍ଚ ରିପୋର୍ଟ ଦେଇଥିବା ଓ କାହାରି କୌଣସି ତ୍ରୁଟି ନଥିବାର ରିପୋର୍ଟ ଜିଲ୍ଲାପାଳଙ୍କୁ ଦେଲାପରେ ସିଲ୍ ହଟାଇ ନିଆଯାଇଥିବା ପ୍ରକାଶ ।

ସେହିପରି ବଲାଙ୍ଗିର- ସମ୍ବଲପୁର ମୁଖ୍ୟ ରାସ୍ତାକଡରେ ଥିବା ଉମାଶଙ୍କର ରାଇସ୍ ମିଲ୍ କୁ ମଧ୍ୟ ପରଦିନ ଅଚାନକ ସିଲ୍ କରିଦିଆଯାଇଥିଲା।କେଉଁ ମିଲ୍ କୁ ଚାଉଳ ଷ୍ଟକ୍ ହେରଫେର ଓ କାହାକୁ ପ୍ରଦୂଷଣ ଆଇନ୍ ର ଖିଲାପ ଆଦି କାରଣର ଆଳ ଦର୍ଶାଇ ଏପରି ତ୍ବରିତ କାର୍ଯ୍ୟାନୁଷ୍ଠାନ ନିଆ ଯାଇଥିବା କୁହା ଯାଉଥିଲେ ହେଁ , ଏହା ପଛରେ ମୋଟାଅଙ୍କର ବଟି ଆଦାୟ ମୁଖ୍ୟ ଉଦ୍ଦେଶ୍ୟ ଥିବା ଓ ଭିତିରିଆ ଡିଲ୍ ପରେ ଉକ୍ତ କଟକଣା ଉଠାଇ ନିଆଯାଉଥିବା ଲୋକେ ଆଲୋଚନା କରୁଛନ୍ତି ।  ଏଭଳି ଅଚାନକ କାର୍ଯ୍ୟାନୁଷ୍ଠାନର କାରଣ ସମ୍ପର୍କରେ ପଚରାଯିବାରୁ  ସୁବର୍ଣ୍ଣପୁର ଜିଲ୍ଲା ଯୋଗାଣ ବିଭାଗର ଅତିରିକ୍ତ ବେସାମରିକ ଜିଲ୍ଲା ଯୋଗାଣ ଅଧିକାରୀ ଯୋଗେଶ୍ବର ସାଏ  , ଏହା ଜାଣି ନଥିବା ପ୍ରକାଶ କରିଛନ୍ତି । ସେ କହିଛନ୍ତି ଯେ , ଆମକୁ ଡକାଯାଇ ନାହିଁ କିମ୍ବା ଆମେ ଜାଣିନାହୁଁ ।  ଜିଲ୍ଲାମାଜିଷ୍ଟ୍ରେଟ୍ ହିସାବରେ ଜିଲ୍ଲାପାଳ ଏପରି କରିପାରିବେ ।  ଆପଣ ସେ ଅଞ୍ଚଳରେ ଯାଇ ପଚାରନ୍ତୁ । ଜିଲ୍ଲାପାଳ କେଉଁ କେଉଁ ଗଣମାଧ୍ୟମରେ ଏହାର କାରଣ ସମ୍ପର୍କରେ ବୋଧେ କହିଥିବା ପରି ଲାଗୁଛି ।

ବାରମ୍ବାର ଚେଷ୍ଟା କରି ମଧ୍ୟ ଜିଲ୍ଲା ଯୋଗାଣ ଅଧିକାରୀ ସୁରେଶ କୁମାର ପାଣିଗ୍ରାହୀଙ୍କର ଦେଖାମିଳୁ ନଥିବା ସହିତ ସେ  ଫୋନ୍ ଉଠାଉ ନଥିବାରୁ ଏ ସମ୍ପର୍କରେ ଏଭଳି ସଙ୍ଘାକଥା ବ୍ୟତୀତ ପ୍ରକୃତ କାରଣ ଜଣାପଡିପାରିନାହିଁ । ଚଢାଉର ପୂର୍ବରୁ ସୋନପୁର ସର୍କିଟ୍ ହାଉସ୍ ରେ ସାଂସଦ ଜିଲ୍ଲା ଯୋଗାଣ ଅଧିକାରୀଙ୍କ ଉପରେ ପ୍ରବଳ ବର୍ଷିଥିବା ପ୍ରକାଶ । ତଦୃପ ଏ ସମ୍ପର୍କରେ  ଚେଷ୍ଟା କରାଯାଇ ଥିଲେ ହେଁ , ଜିଲ୍ଲାପାଳ ଅନ୍ୟା ଦାସ ବା ସାଂସଦ ସଙ୍ଗୀତା ସିଂଦେଓଙ୍କର ମତାମତ ମିଳିପାରିନାହିଁ । କେତେକ ମିଲ୍ ମାଲିକମାନଙ୍କୁ ଏହାର କାରଣ ସମ୍ପର୍କରେ ମଧ୍ୟ ପଚରାଯାଇଥିଲା । ସେମାନେ ‘ ଆଉଥରେ ସେ ଜିତିବେ ନାହିଁ ‘ ବୋଲି ଅଭିଶାପ ଦେଲାପରି ପରୋକ୍ଷୋଽକ୍ତି ପ୍ରକାଶ କରିଥିବାବେଳେ ଆଉ କେତେକ ‘ ଆମେ ବେପାରୀ ଓ ଏ ସମ୍ପର୍କରେ ଆମ ମୁହଁ ଖୋଲିବ ନାହିଁ ‘ ବୋଲି କହି ଏଡାଇ ଯାଇଛନ୍ତି । ଆଉ କେତେକ ମିଲର୍ ଓ ମିଲ୍ କର୍ମଚାରୀ  ‘ ଗତ ୨୪/ ୨୫ ବର୍ଷ ମଧ୍ୟରେ ଏଭଳି ହଠାତ୍ ଚଢାଉ ଓ ସିଲ୍ କରିଦେବା ପ୍ରଥମଘଟଣା ‘ ବୋଲି କହି ବିସ୍ମୟ ପ୍ରକାଶ କରିଛନ୍ତି  !

ଅନ୍ୟପକ୍ଷରେ କେତେକ ଖବରକାଗଜରେ ‘ଏହା ପଛରେ ଅର୍ଥ କାରବାର ରହିଛି ଓ ସାମାଜିକ ଗଣମାଧ୍ୟମରେ ଏ ବିଷୟରେ ଚର୍ଚ୍ଚା ପ୍ରକାଶ ପାଇଛି ବୋଲି ପ୍ରକାଶ ପାଇଛି ।  ଲୋକଙ୍କ ମଧ୍ୟରେ ହେଉଥିବା ଚର୍ଚ୍ଚାରୁ ଦଲାଲ୍ ମାନଙ୍କ ଜରିଆରେ ପ୍ରତ୍ୟେକ ମିଲ୍ ରୁ ୫ ଲକ୍ଷ ଲେଖାଏଁ  ଜିଲ୍ଲାର ୫୦ ଟି ମିଲ୍ ରୁ ପ୍ରାୟ ୧୦ କୋଟି ରାଜନୈତିକ ଦଳୀୟ ଚାନ୍ଦା ଆଦାୟ କରୁଥିବା ଅଭିଯୋଗର ଚର୍ଚ୍ଚା ପ୍ରକାଶ ପାଇଛି । ଏହା ସତ୍ୟ ହୋଇଥିଲେ ସାଙ୍ଘାତିକ୍  !  ନିର୍ବାଚିତ ଲୋକ ପ୍ରତିନିଧିଙ୍କର ଏତାଦୃଶ ରକ୍ଷକ ହୋଇ ଭକ୍ଷକ ସାଜିବାର ନିରଙ୍କୁଶ ଭୂମିକାକୁ ଜନସାଧାରଣଙ୍କ ପକ୍ଷରୁ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ଏ ସମ୍ପର୍କରେ ଜଣେ ସାଂସଦଙ୍କ ଅନୁଗତଯୁବନେତା ବା ଆରୋପିତ ମଧ୍ୟସ୍ଥିଙ୍କୁ ମଧ୍ୟ ପଚରାଯାଇଥିଲା । ସେ ଏଭଳି ଅଭିଯୋଗକୁ ଅସ୍ବୀକାର କରିଛନ୍ତି । ସେ କହିଲେ ଯେ , ଆଗାମୀ ଧାନକିଣା ପାଇଁ ସରକାର ସର୍ବନିମ୍ନ ସହାୟକ ମୂଲ୍ୟ କ୍ବିଣ୍ଟାଲ୍ ପିଛା ୩୧୦୦ ଟଙ୍କା ଘୋଷଣା କରିଥିଲେ ଓ ଏଇ ପ୍ରତିଶ୍ରୁତି ନିମନ୍ତେ ଆମ ସରକାର କ୍ଷମତାକୁ ଆସିଲା । ତେଣୁ ସାରାରାଜ୍ୟରେ ଅସାଧୁ ମିଲର୍ସଙ୍କୁ ସାବାଡ୍ କରିବାକୁ ଜିଲ୍ଲାରେ ଏଭଳି ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି । ପରବର୍ତ୍ତୀକାଳରେ ଜିଲ୍ଲାର ସବୁ ମିଲ୍ ଉପରେ ମଧ୍ୟ ଏହିପରି ଯାଞ୍ଚ କରିଯିବ  ! ‘ ତାଙ୍କର ଏହି ସଫେଇକୁ ଜନସାଧାରଣ କିପରି ଗ୍ରହଣ କରିବେ , ଏହା ଲୋକଙ୍କ ଉପରେ ଛାଡି ଦିଆଯାଉ ! ସର୍ବୋପରି ଏଭଳି କାର୍ଯ୍ୟାନୁଷ୍ଠାନ ସମ୍ପର୍କରେ ଗଣମାଧ୍ୟମରେ ଲୋକଙ୍କୁ ଜଣାଇ ଦିଆଯିବାରେ ଅସୁବିଧା କେଉଁଠି ? – ଯାହାକୁ ଅଦ୍ୟାବଧି ଗୋପନ ରଖାଯାଇ ଆସିଛି  ! ଏ କପଟାଚାର ଏକ ଗାଣତାନ୍ତ୍ରିକ ଶାସନବ୍ୟବସ୍ଥାରେ ସ୍ପୃହଣୀୟ ନୁହେଁ  !

ତେବେ ଏହି ଲୋକପ୍ରତିନିଧି ଓ ପ୍ରାଶାସନିକ ଅଧିକାରୀଙ୍କର ଯେଉଁ କାର୍ଯ୍ୟକଳାପ ଓ ପୂର୍ବର ଯେଭଳି ଭାବମୂର୍ତ୍ତି ଲୋକଙ୍କ ଭିତରେ ରହିଆସିଛି, ଉପରୋକ୍ତ କୈଫିୟତ୍ ଯଥେଷ୍ଟ ନୁହେଁ । ଅପରପକ୍ଷରେ ବିଗତ ୨୪ ବର୍ଷର ବିଜେଡି ସରକାର ଅମଳରେ ସମବାୟ ବିଭାଗ , ଯୋଗାଣ ବିଭାଗ , ପେକ୍ସ ବା ମଣ୍ଡି ଜରିଆରେ ଧାନକିଣା ଓ ମିଲର୍ସମାନେ ଚାଷୀଙ୍କୁ ଠକି ମାଲାମାଲ୍ ହେଉଥିବା ଅଭିଯୋଗ ମଧ୍ୟ ନିରାଧାର ନୁହେଁ । ସୁବର୍ଣ୍ଣପୁର ଜିଲ୍ଲାର ତଥା ସୋନପୁର ବିଧାୟକ ନିରଞ୍ଜନ ପୂଜାରୀଙ୍କ ଘନିଷ୍ଠମିଲର୍ସଙ୍କ ଉପରେ ଏହି ଚଢାଉକୁ କେତେକ ପକ୍ଷରୁ ରାଜନୈତିକ ଆକ୍ରୋଶମୂଳକ ବୋଲି ମଧ୍ୟ ଆରୋପର ଚର୍ଚ୍ଚା ହେଉଛି ।

ଉଲ୍ଲେଖନୀୟ ଯେ , ପ୍ରାୟ ୧୫ ଦିନ ତଳେ ସୁବର୍ଣ୍ଣପୁର ମିଲର୍ସ ସଂଘର ସଭାପତି ଓ ସମ୍ପାଦକ କୌଣସି କାରଣରୁ ପଦରୁ ଇସ୍ତଫା ଦେଇଛନ୍ତି । ଏହି ଚଢାଉରେ ବାଛିଲା ପରି ବିଜେଡି ବିଧାୟକ ନିରଞ୍ଜନ ପୂଜାରୀଙ୍କ ସମର୍ଥକ ତଥା ସଭାପତି ଓ ସମ୍ପାଦକଙ୍କ ମିଲ୍ ଉପରେ ଏଭଳି ଅପମାନଜନକ ଭାବେ ଅଚାନକ କାର୍ଯ୍ୟନୁଷ୍ଠାନକୁ ଉପରୋକ୍ତ ଚର୍ଚ୍ଚା ମଧ୍ୟ ଖୋରାକ୍ ଯୋଗାଇଛି ।

ସର୍ବୋପରି ଏହାମଧ୍ୟ ଆଦୌ ଅମୂଳକ ନୁହେଁ ଯେ ସୁବର୍ଣ୍ଣପୁର ଜିଲ୍ଲାରେ ଯୋଗାଣବିଭାଗ , ସମବାୟ ବିଭାଗ ବା ପେକ୍ସ ,ଧାନମଣ୍ଡି , ମିଲର୍ସ , ନିୟନ୍ତ୍ରିତ ବଜାର କମିଟି ଇତ୍ୟାଦିର କାର୍ଯ୍ୟକଳାପ ଗତ କିଛିବର୍ଷ ଧରି ଚରମ ଦୁର୍ନୀତିଗ୍ରସ୍ତ ହୋଇପଡିଛି ।  କିଛିବର୍ଷ ତଳର ଏକାଧିକ ଟ୍ରକ୍ ଚାଉଳଚାଲାଣ ଧରାପଡିବା ଘଟଣା ହେଉ ବା ଅଳ୍ପଦିନ ତଳେ କମସରା ପେକ୍ସରେ ପ୍ରାୟ ୩୫ ଲକ୍ଷର ମିଥ୍ୟାଖରିଫ ଧାନକିଣାର ଫେକ୍ ଭେଣ୍ଡର ସହ କଙ୍ଗାରୁକୋର୍ଟରେ ସମାଧାନ ମାମଲାକୁ ବିଭାଗ ଓ ପ୍ରଶାସନ ନଜର ଅନ୍ଦାଜ୍ କରିଦେଇ ଚପାଇ ଦିଆଯିବା ଘଟଣା ହେଉ ଅଥବା ସଂପ୍ରତି ଡୁଙ୍ଗୁରିପାଲି ଆର୍ ଏମ୍ ସି ସେକ୍ରେଟାରୀଙ୍କ ବିରୁଦ୍ଧରେ ଖବରକାଗଜରେ ପ୍ରକାଶିତ ଚାଞ୍ଚଲ୍ୟକର ଦୁର୍ନୀତିଅଭିଯୋଗ ହେଉ କିମ୍ବା ନିକଟରେ ଯୋଗାଣ ମନ୍ତ୍ରୀ ଆସି ଯାଞ୍ଚ କରି ଚାଉଳନମୁନା ପରୀକ୍ଷା ପାଇଁ ନିଥିବା ଶୀତଲ୍ ମିଲ୍ ବିରୁଦ୍ଧରେ ରିସାଇକ୍ଲିଂ ଓ ନିମ୍ନମାନର ଚାଉଳର ଅଭିଯୋଗ ହେଉ ;  ଏସବୁ ଚର୍ଚ୍ଚିତ ଅଭିଯୋଗର ତଦନ୍ତ କରାଯାଇନାହିଁ ବୋଲି ମଧ୍ୟ ଚର୍ଚ୍ଚା ହେଉଛି।  ବିଗତ ୨୪ ବର୍ଷଧରି ପୂର୍ବତନ ମନ୍ତ୍ରୀ ବିଜେଡି ବିଧାୟକ ନିରଞ୍ଜନ ପୂଜାରୀଙ୍କ ସଂରକ୍ଷଣରେ ରହିଆସିଥିବା ଏହି ମିଲର୍ସସଂଘର କର୍ମକର୍ତ୍ତା ବା ପରିବାର ଉପରେ ଦାଉ ସାଧିବାକୁ ଇଏ ଏକ ଆକ୍ରୋଶମୂଳକ କାର୍ଯ୍ୟାନୁଷ୍ଠାନ ନୁହେଁ ତ ?

ସଂଯୋଗବଶତଃ ଉକ୍ତ ନିୟନ୍ତ୍ରିତ ବଜାର କମିଟିର ସମ୍ପାଦକ ଓ ସିଲ୍ କରାଯାଇ ଦୁଇଦିନ ପରେ ଖୋଲିଦିଆଯାଇଥିବା ଏକାଧିକ ମିଲ୍ ର ମିଲର୍ସ ଗୋଟିଏ ପରିବାରର । ଏଣୁ ଏହାପଛରେ ଯେ ଆଦୌ ରାଜନୈତିକ ଆକ୍ରୋଶ ନାହିଁ , ଏହା କୁହାଯାଇ ପାରିବନି  !

ତେବେ ଆଜିର ଗଣତାନ୍ତ୍ରିକ ଶାସନବ୍ୟବସ୍ଥାରେ ଓ ସ୍ବଚ୍ଛ ବା ଦୁର୍ନୀତିମୁକ୍ତ ଶାସନର ପ୍ରତିଶ୍ରୁତି ଦେଇ କ୍ଷମତାକୁ ଆସିଥିବା ଡବଲଇଞ୍ଜିନ୍ ସରକାରର ସାଂସଦ , ବିଧାୟକ ଓ ଜିଲ୍ଲାପାଳ ଉପରୋକ୍ତ ଯାଞ୍ଚ /ତଦାରଖ /ତଦନ୍ତଆଦି କାର୍ଯ୍ୟାନୁଷ୍ଠାନ ନିମନ୍ତେ ବ୍ରିଟିଶ୍ କାଳର ଶାସନ ପରି ନିଜହାତରେ କ୍ଷମତାର ମାତ୍ରାଧିକ ପ୍ରୟୋଗ ପରିବର୍ତ୍ତେ ତାଙ୍କ ସରକାରର ଅଧୀନସ୍ଥ ବିଭାଗୀୟ କାର୍ଯ୍ୟାନୁଷ୍ଠାନ ମଧ୍ୟ କରାଯାଇପାରିବ  ‘ ବୋଲି ଲୋକେ ଆଲୋଚନା କରୁଛନ୍ତି ।