ସମ୍ପାଦକ- ଆକାଉଣ୍ଟାଣ୍ଟଙ୍କ ମଧ୍ୟରେ ଟଣାଓଟରାରୁ ଗୁମରର ପର୍ଦ୍ଦାଫାଶ୍ ?

ଡୁଙ୍ଗୁରିପାଲି  : ସୁବର୍ଣ୍ଣପୁର ଜିଲ୍ଲାର ଡୁଙ୍ଗୁରିପାଲି ନିୟନ୍ତ୍ରିତ ବଜାର କମିଟିର ସମ୍ପାଦକଙ୍କ ବିରୁଦ୍ଧରେ ଏବେ ପ୍ରକାଶ ପାଇଛି ମାଳ ମାଳ ଗୁରୁତର ଅଭିଯୋଗ ।  ଏହା ଏକ ଖବରକାଗଜରେ ପ୍ରକାଶ ପାଇଲାପରେ ସାରାଜିଲ୍ଲାରେ ଆରମ୍ଭ ହୋଇଛି ବ୍ୟାପକ ଚର୍ଚ୍ଚା । ଏତେବର୍ଷ ପରେ  ଚାଷୀଙ୍କ ଆଳରେ ଏଭଳି ଅଭିଯୋଗର ପର୍ଦ୍ଦାଫାଶ୍ ପଛରେ ରହିଛି ସମ୍ପାଦକ- ହିସାବ ରକ୍ଷକଙ୍କ ମଧ୍ୟରେ ଟଣାଓଟରା ବୋଲି ଲୋକେ ଆଲୋଚନା କରୁଛନ୍ତି । ତେବେ ଏହାପରେ ସୋନପୁର ଭିଜିଲାନ୍ସ ଡିଏସପି ଆସି ଆରଏମସି ଅଫିସ୍ ରୁ କିଛି କାଗଜପତ୍ର ନେଇଥିବା ଜଣାଯାଇଛି ।  ତେବେ ଅଭିଯୁକ୍ତ ସମ୍ପାଦକଙ୍କ ଘର ପାଖରେ ଉକ୍ତ ମହିଳା ଭିଜିଲାନ୍ସ ଡିଏସପିଙ୍କ ଅଫିସ୍ ଅବସ୍ଥିତ ରହିଥିବାରୁ ଓ ଖୋଦ୍ ଜିଲ୍ଲାପାଳ ଏହି ସଂସ୍ଥାର ଅଧ୍ୟକ୍ଷା ଥିବାରୁ ତଦନ୍ତର ଫଳାଫଳ ନେଇ ଲୋକେ ସନ୍ଦେହ ପ୍ରକାଶ କରିଛନ୍ତି । ଏହି ଅଭିଯୋଗରେ ପୂର୍ବ ସରକାରର କ୍ରମାଗତ ବିଧାୟକ ତଥା ପୂର୍ବତନ ମନ୍ତ୍ରୀଙ୍କ ନିଜ ବ୍ଲକ୍ ର ମାମଲା ହୋଇଥିବାରୁ ଏବଂ ଏବେ ପୁଣି ସେ ବିଧାୟକ ରହିଥିବାରୁ ତାଙ୍କର ସଂରକ୍ଷଣରେ ଏସବୁ ଚାଲିଥିଲା ବୋଲି ଆରୋପର ଛିଟା ବାଜିଥିବାରୁ ଅଭିଯୁକ୍ତ ସମ୍ପାଦକ ଏତେ ବିଚଳିତ ନଥିବା ଲକ୍ଷ୍ୟକରାଯାଇଛି । ସମସ୍ତେ ଜାଣନ୍ତି , ଅଭିଯୁକ୍ତ ସମ୍ପାଦକ ଉଦିତ କୁମାର ବାବୁ ବିଧାୟକ ନିରଞ୍ଜନ ପୂଜାରୀଙ୍କ ପାଖଲୋକ । ତେଣୁ ଦେଖାଯାଉ , ସ୍ବଚ୍ଛତାର ଡିଣ୍ଡିମ ପିଟୁଥିବା ଏବର ମୋହନ ସରକାରର ବିଭାଗୀୟ ମନ୍ତ୍ରୀଙ୍କ ତଦନ୍ତ ନିର୍ଦ୍ଦେଶ କେତେ କାମ ଦେଉଛି ?

ପ୍ରକାଶିତ ଅଭିଯୋଗ ଅନୁଯାୟୀ , ଗଲା ଜୁଲାଇ ୩୧ ତାରିଖରେ ଚାଷୀମାନେ ବିଭାଗୀୟ ମନ୍ତ୍ରୀଙ୍କୁ ଯାଇ ଅଭିଯୋଗ କରିଥିଲେ । ମନ୍ତ୍ରୀ  ୧୫ ଦିନ ମଧ୍ୟରେ ଏ ସମ୍ପର୍କରେ ତାଙ୍କୁ ରିପୋର୍ଟ ଦେବାକୁ ରାଜ୍ୟ ସମବାୟ ସମିତି ସମୂହ ନିବନ୍ଧକ ଭକ୍ତବନ୍ଧୁ ସାହୁଙ୍କୁ ଓ ସେ ରାଜ୍ୟ କୃଷି ବିପଣନ ଅଧିକାରୀଙ୍କୁ ତଦନ୍ତ ନିର୍ଦ୍ଦେଶ ଦେଇଥିଲେ ।

ଏବେ ଏହି ଆରଏମସିର ସମ୍ପାଦକ ଥିବା ଉଦିତ କୁମାର ବାବୁ ଗତ ୭ । ୧୧ । ୨୦୧୬ ତାରିଖରୁ ମଝିରେ ଅଳ୍ପସମୟ ଛାଡି ଅବସ୍ଥାପିତ ରହିଆସିଛନ୍ତି । ସେ ଏଠାରେ ଏକଛତ୍ରବାଦ ଚଳାଇଛନ୍ତି । ତାଙ୍କର ପଦୋନ୍ନତି ପରେ ତାଙ୍କୁ ବଲାଙ୍ଗୀରକୁ ବଦଳି ହୋଇଥିଲା । ତେବେ ସେ ପୂର୍ବ ସରକାରଙ୍କ ଅନୁକମ୍ପା ବଳରେ ସେଠାରୁ ସୋନପୁର ଆସି ପୁଣି ଏହି ଆରଏମସିରେ ରହିଛନ୍ତି । ଉଲ୍ଲେଖନୀୟ ଯେ ଏହି ଡୁଙ୍ଗୁରିପାଲି ନିୟନ୍ତ୍ରିତ ବଜାର କମିଟିର ଏରିଆ ସୁବର୍ଣ୍ଣପୁର ଜିଲ୍ଲାର ଡୁଙ୍ଗୁରିପାଲି ସମେତ ତରଭା , ବିନିକା ଓ ସୋନପୁର ବ୍ଲକ୍ ରହିଛି ।  ତାଙ୍କ କାର୍ଯ୍ୟକାଳରେ ୫୦ କୋଟି ଟଙ୍କାରୁ ଉର୍ଦ୍ଧ୍ବ ଅନିୟମିତତା ହୋଇଛି । ଏଥିରେ ଅନାବଶ୍ୟକ ନିର୍ମାଣ , ଦରକାର ନଥିବା ଯନ୍ତ୍ରପାତି କ୍ରୟ , ତାରପୋଲିନ୍ କିଣା , ବିନା ଟେଣ୍ଡରରେ  ବଜାରଦର ଠାରୁ ଅଧିକମୂଲ୍ୟରେ ମେସିନ୍ କ୍ରୟ ,ବେଆଇନ୍ ନିଯୁକ୍ତି ଓ ଧାନକିଣାରେ ମିଲର୍ସ ଓ ଚାଷୀଙ୍କ ମଧ୍ୟରେ ଅବୈଧ ବୁଝାମଣା ଆଦି ଗୁରୁତର ଅଭିଯୋଗ ଅନ୍ତର୍ଭୁକ୍ତ ।

ଉଦାହରଣ ସ୍ୱରୂପ , ଆର ଏମ ସିକୁ ବହୁତ କମ୍ ଧାନ ଆସିବା ସହିତ ଚାଷୀଙ୍କ ଧାନ ସିଧା ମିଲ୍ କୁ ଯାଇଥାଏ ଓ ଏଠାରେ କମ୍ ଧାନ ଓଜନ ଇତ୍ୟାଦି ହୋଇଥାଏ । ପୂର୍ବରୁ ଥିବା ମେସିନ୍ ସଚଳ ଥାଇ ବି ଅନାବଶ୍ୟକ ଭାବେ ନୂଆ ମେସିନ୍ ବଜାରଦର ଠାରୁ ଅଧିକ ମୂଲ୍ୟରେ କିଣାଯାଇଛି । ପେଡି କ୍ଲିନର୍ ମେସିନ୍ ଖତ ଖାଉଥିବା ବେଳେ ୧୦ ଟି ମେସିନ୍ ୧୨ ରୁ ୧୫ ଲକ୍ଷ ଟଙ୍କାରେ ମିଳୁଥିବା ବେଳେ ୨୮ ଲକ୍ଷ ଟଙ୍କାରେ କିଣାଯାଇଛି । ବିନା ଟେଣ୍ଡରରେ ପେଡି ଲିଫ୍ଟିଂ ମେସିନ୍ , ମିଶ୍ଚର ଚେକ୍ ମେସିନ୍  , ସୋଲାର୍ ସିଷ୍ଟମ୍ , ଅଗ୍ନି ନିର୍ବାପକ ଯନ୍ତ୍ର , ଜେନେରେଟର ଆଦି ଓ  ୩ ହଜାରରୁ ଅଧିକ ତାରପୋଲିନ୍ ଅଧିକ ମୂଲ୍ୟର ବିଲ୍ କରାଯାଇ ଅର୍ଥ ଆତ୍ମସାତ୍ କରାଯାଇଛି । ସୋନପୁରରେ ସୁପର ମାର୍କେଟ୍ ସହ ସିନେମାହଲ୍ ନିର୍ମାଣ , ନିଜେ ଓ ସହକାରୀ ଯନ୍ତ୍ରୀଙ୍କ ସହିତ ମିଶି କୋଟି କୋଟି ଟଙ୍କାର ନିମ୍ନମାନର କାମ କରାଯାଇ ଅହେତୁକ ମାର୍କେଟ୍ ୟାର୍ଡ ନିର୍ମାଣ ଇତ୍ୟାଦି  କରାଯାଇଛି । ସୁପର୍ ମାର୍କେଟ୍ ଓ ସିନେମାହଲ୍ ନିର୍ମାଣ ପାଇଁ ଟେଣ୍ଡରରେ ଚଞ୍ଚକତା ପୂର୍ବକ ୩୦ କୋଟିର ବ୍ୟୟ ଅଟକଳ କରାଯାଇ ୮ କୋଟି ଟଙ୍କା ଅଗ୍ରୀମ ଦିଆଯାଇଛି । ପ୍ଲାନ୍ ଏଷ୍ଟିମେଟ୍ ନାଁ’ରେ ଏକ ଏଜେନ୍ସିକୁ ୭୦ ଲକ୍ଷ ଟଙ୍କା ଦିଆଯାଉଥିବା ବେଳେ ଏବେ ଆର ଏମ ସିକୁ ଏପର୍ଯ୍ୟନ୍ତ ଏଥିପାଇଁ ଜାଗା ମିଳିନାହିଁ  !

ଏହା ପ୍ରକାଶ ପାଇବା ପରେ ଆମ ପକ୍ଷରୁ ସମ୍ପୃକ୍ତ ସମ୍ପାଦକ ଉଦିତ କୁମାର ବାବୁଙ୍କୁ ପଚରାଯିବାରୁ ସେ ସମସ୍ତ ଅଭିଯୋଗକୁ ଅସ୍ବୀକାର କରିଛନ୍ତି । ସେ କହିଛନ୍ତି ଯେ ସମସ୍ତ କିଣା , ନିର୍ମାଣ , ନିଯୁକ୍ତି ଆଦି ଗାଇଡ୍ ଲାଇନ୍ ମୁତାବକ ଇ- ଟେଣ୍ଡର ଓ ଅନ୍ ଲାଇନ୍ ପଦ୍ଧତିରେ କମିଟି ଏବଂ ଉପରିସ୍ଥ ଅଧିକାରୀଙ୍କ ଅନୁମୋଦନରେ କରାଯାଇଛି । ତଦନ୍ତ ହେଲେ ପ୍ରକୃତ ସତ୍ୟ ବାହାରିବ । ତାଙ୍କ ପାଖରେ ସବୁର ଗୋଟି ଗତଟି କରି କାଗଜପତ୍ରର ତଥ୍ୟପ୍ରମାଣ ରହିଛି ।  ମୁଁ ଏକାକୀ ଜିଲ୍ଲାପାଳ ବା କମିଟିର ବିନା ଅନୁମୋଦନରେ କିପରି ଏସବୁ କରିପାରିବି ?  ଅଫିସ୍ ର ଆକାଉଣ୍ଟାଣ୍ଟ୍ ସୁଶାନ୍ତ ମେହେର ଏସବୁ ପଛରେ ରହିଛନ୍ତି । ତାଙ୍କର ପଦୋନ୍ନତି ପରେ ସେ ସମ୍ପାଦକ ପଦରେ ରହିବାକୁ ମୋତେ ଅଯଥାରେ ବଦନାମ କରୁଛନ୍ତି ।

ଏହାପରେ ଆକାଉଣ୍ଟାଣ୍ଟ୍ ସୁଶାନ୍ତ ମେହେରଙ୍କୁ ସମ୍ପାଦକଙ୍କ ଆରୋପ ଓ ପ୍ରତ୍ୟଭିଯୋଗ ସମ୍ପର୍କରେ ପଚରାଯିବାରୁ ସେ କହିଛନ୍ତି ଯେ ,  OSAMB ଦ୍ବାରା ୨୦୧୦ରେ ଜଣେ କୋ- ଅପରେଟିଭ୍ ଇନିସପେକ୍ଟର ଭାବେ  ନିଯୁକ୍ତ ଓ ସୋନପୁର ଏଆର ଅଫିସ୍ ରେ ଅବସ୍ଥାପିତ ଉଦିତ କୁମାର ବାବୁ ୨୦୧୬ ରୁ ସୋନପୁର ଜିଲ୍ଲା ବନାମ ଏହି ଡୁଙ୍ଗୁରିପାଲି ନିୟନ୍ତ୍ରିତ ବଜାର କମିଟିର ସମ୍ପାଦକ ଭାବରେ ଡେପୁଟେସନରେ ରହିଆସିଛନ୍ତି । ତାଙ୍କ ନିଯୁକ୍ତି କର୍ତ୍ତା ରେଜିଷ୍ଟ୍ରାର୍ କୌଣସି ଇନିସପେକ୍ଟରଙ୍କୁ ଡେପୁଟେସନରେ ଏମିତି ଏଠାକୁ ପଠାଇପାରିବେ ନାହିଁ ।  ତାଙ୍କର ଦୀର୍ଘବର୍ଷ ଧରି ଏଠାରେ ରହିଥିବା ଓ କାର୍ଯ୍ୟକଳାପ ବିରୋଧରେ ଚାଷୀମାନେ ଯାଇ ବିଭାଗୀୟ ମନ୍ତ୍ରୀ ପ୍ରଦୀପ ବଳସାମନ୍ତଙ୍କୁ ଭେଟି ଅଭିଯୋଗ କରିଥିଲେ । ଏଥିରେ ମୋର କୌଣସି ସମ୍ପୃକ୍ତି ନାଇଁ ଓ କେଉଁ ଚାଷୀମାନେ ଅଭିଯୋଗ କରିଛନ୍ତି , ସେ ସମ୍ପର୍କରେ ମୋତେ ଜଣାନାହିଁ । ଜଣେ ସ୍ଥାନୀୟ ବ୍ୟକ୍ତି ସୂଚନା ଅଧିକାର ଆଇନ୍ ବଳରେ ଅଫିସ୍ କୁ ତଥ୍ୟମାଗି ନେଇଛନ୍ତି ଓ ଏବେ ସୋନପୁର ଭିଜିଲାନ୍ସ ଆସି ଅଫିସ୍ ରୁ କିଛି କାଗଜପତ୍ର ନେଇଥିବା କଥା ମୁଁ ଜାଣେ । ଉଦିତ ବାବୁ କେମିତି ଡେପୁଟେସନରେ  ସର୍ବାଧିକ ୩ ବର୍ଷରୁ ଅଧିକ ଏତେବର୍ଷ ସମ୍ପାଦକ ପଦରେ ରହିଲେ ବା ସୋନପୁର ଜିଲ୍ଲାରେ ୧୪ ବର୍ଷଧରି ଅଛନ୍ତି , ସେ ଜାଣନ୍ତି ! ସେହିପରି ମୋର ପଦୋନ୍ନତି ପରେ ମୋତେ କେଉଁଠି ଅବସ୍ଥାପିତ କରିବେ , ବିଭାଗ ବା ସରକାର ଜାଣନ୍ତି ବୋଲି ସଫେଇ ଦେଇଛନ୍ତି ।

ଏହା ସହିତ ସେ ଆର ଏମ ସି ଓ ଏହି ଅଫିସ୍ ସମ୍ପର୍କରେ ପ୍ରକାଶ କରିଥିଲେ ଯେ କେଉଁମାନେ ଏଠାରେ କିଭଳି ଭାବରେ ଅପ୍ ଗ୍ରେଡେସନ ଓ ନୂତନ ନିଯୁକ୍ତି ପାଇଛନ୍ତି , ସେ ବିଷୟରେ ସମ୍ପାଦକ ହିଁ କହିପାରିବେ ! ହିସାବ ରକ୍ଷକ କହିଲେ ଯେ , ଚାଷୀଙ୍କ ଉନ୍ନତି ପାଇଁ ରହିଥିବା ଆର ଏହି ସଂସ୍ଥାର ସିନେମାହଲ୍ ତିଆରି ଅନାବଶ୍ୟକ । ଅପରପକ୍ଷରେ ଅଫିସ୍ ର ଜଣେ କମ୍ପ୍ୟୁଟର ଅପରେଟର କହିଲେ : ଆଗରୁ ଏହି ଆରଏମସି ଦେବାଳିଆ ସ୍ଥିତିକୁ ଆସିଯାଇଥିବା ବେଳେ ଏବେ ଏହି ସମ୍ପାଦକଙ୍କ ଉଦ୍ୟମରେ ସଂସ୍ଥାରେ ୮୦/ ୯୦ କୋଟିର ଫିକ୍ସ ଡିପୋଜିଟ୍ ରହିଛି । ଯାହା ଆମ ପିଲାମାନଙ୍କ ପାଇଁ ଭବିଷ୍ୟନିଧି ମଧ୍ୟ ହେବ । ଆପଣ ବାହାରେ ପଚାରନ୍ତୁ , ସମ୍ପାଦକ କିପରି ଲୋକ ,ସମସ୍ତେ କହିବେ।

ଏହାର ଉତ୍ତରରେ ହିସାବ ରକ୍ଷକ କହିଥିଲେ : ସେ କହିବନି କେମିତି ? ତା’ ନିଯୁକ୍ତିରେ ଅନିୟମିତତା ରହିଛି । ଆରଟିଏ ମାଗନ୍ତୁ ! ଏହିପରି ଅଫିସ୍ ର କର୍ମଚାରୀଙ୍କ ଭିତରେ ମଧ୍ୟ ସମ୍ପାଦକଙ୍କ ସମ୍ପର୍କରେ ଭିନ୍ନ ଭିନ୍ନ ମତ ଶୁଣିବାକୁ ମିଳିଥିଲା ।

ତେବେ ସେ ଯାହାହେଉ , ବିନକା ନିକଟସ୍ଥ ଭମରପାଲି ଗ୍ରାମନିବାସୀ ସୋନପୁର ଧୋବାବାହାଲିରେ ରହୁଥିବା ଉଦିତ କୁମାର ବାବୁଙ୍କ ବିରୁଦ୍ଧରେ ପ୍ରକାଶିତ ଓ ତଦନ୍ତାଧୀନ ଏସବୁ ଗୁରୁତର ଅଭିଯୋଗର ସେ ଏକମାତ୍ର ଦାୟୀ ହେବେନାହିଁ । ଏତେବର୍ଷକାଳର ଏସବୁ ଦୁର୍ନୀତି ବା ଅନିୟମିତତାରେ ଅଧ୍ୟକ୍ଷ ଥିବା ଜିଲ୍ଲାପାଳ , କମିଟି କାର୍ଯ୍ୟକର୍ତ୍ତା ଓ ସଭ୍ୟ/ ସଭ୍ୟାମାନେ , ବିଭାଗୀୟ ଅଧିକାରୀ ଓ ନିର୍ବାଚିତ ଲୋକପ୍ରତିନିଧିମାନେ ମଧ୍ୟ ଦାୟୀ ହେବେ ବୋଲି ଲୋକମାନଙ୍କ ମଧ୍ୟରେ ଚର୍ଚ୍ଚା ହେଉଛି ।

ଯେତେ ଯେଉଁଠି ଦୁର୍ନୀତି ବା ଅନିୟମିତତା କରୁଥିବା ଅଧିକାରୀ/ କର୍ମଚାରୀମାନ ଅଭିଯୋଗରୁ ଖସିଯିବାକୁ ସେମାନଙ୍କ ପ୍ୟାଣ୍ଟ୍ ରେ ପରିଶ୍ରା କରିବାକୁ ବାଟ ରଖିଥା’ନ୍ତି ବୋଲି ଲୋକେ କଟାକ୍ଷ କରିଛନ୍ତି । ସତରେ ତଦନ୍ତରେ ଏହଘ ସତ୍ୟାସତ୍ୟ ବାହାର କରିବେ ମୋହନ ସରକାର  ?