ବଲାଙ୍ଗୀର  :  ଗତ ସରକାରଙ୍କ ଅମଳରେ ସରକାରୀ ପ୍ରାଥମିକ ଓ ହାଇସ୍କୁଲ ଛାତ୍ରଛାତ୍ରୀଙ୍କର ସରକାରଙ୍କ ଦ୍ବାରା ନିର୍ଦ୍ଧାରିତ ୟୁନିଫର୍ମ ଯୋଗାଣରେ ଗତବର୍ଷଠାରୁ ଏଯାବତ୍ ହେରଫେର ଅଭିଯୋଗ ପରେ ଏବେ ଅଙ୍ଗନବାଡି ଶିଶୁଙ୍କ ପାଇଁ ସରକାର ଯୋଗାଉଥିବା ଶୀତବସ୍ତ୍ର ବା ସୁଇଟର ଯୋଗାଣରେ ମଧ୍ୟ ସେଇଭଳି ଢଙ୍ଗରେ ସେଇ ପୋଷାକମାଫିଆଙ୍କ ଦ୍ବାରା ଅଧିକୃତ ତଥାକଥିତ ଚୟନ କମିଟି ଓ ଅଧିକାରୀଙ୍କ ସହ ଅବୈଧ ମଧୁଚନ୍ଦ୍ରିକାରେ ବ୍ୟାପକ ଅନିୟମିତତା ଓ ଦୁର୍ନୀତିର ଅଭିଯୋଗ ରହିଆସୁଛି ।

ଉଲ୍ଲେଖନୀୟ ଯେ , ଗତବର୍ଷ ବଙ୍ଗୋମୁଣ୍ଡା ବ୍ଲକ୍ ରୁ ଆରମ୍ଭ କରି ସୁବର୍ଣ୍ଣପୁର ଜିଲ୍ଲାର ତରଭା ଓ ଚଳିତବର୍ଷ ପୁଇଁତଳା ବ୍ଲକ୍ ସମେତ ଟିଟିଲାଗଡ ଓ ଅନ୍ୟାନ୍ୟ ବ୍ଲକ୍ ରେ ସ୍କୁଲ୍ ଡ୍ରେସ୍ ଯୋଗାଣରେଏଭଳି ଅଭିଯୋଗ ପ୍ରକାଶ ପାଇଛି  । ଏହାସହିତ ଏବେ ଅଙ୍ଗନବାଡି କେନ୍ଦ୍ରର ଶିଶୁମାନଙ୍କ ସକାଶେ ସୁଏଟର ଯୋଗାଣରେ ଅନିୟମିତତାର ଅଭିଯୋଗ ପ୍ରକାଶ ପାଇଛି  । 

ରାୟପୁର ରୁ ଶସ୍ତାକପଡା , ହା ଲ୍ କା ସିଲେଇର ଏହିସବୁ ପୋଷାକର ମୂଲ୍ୟରେ ଯଥେଷ୍ଟ ତାରତମ୍ୟ ରହିଛି । ଟେଣ୍ଡର ବନାମ ନୋଟିଫିକେସନ୍ ଜରିଆରେ ତଥାକଥିତ ଚୟନକମିଟିର ହାତଚିକ୍କଣ କରି ପୋଷାକମାଫିଆ ବନାମ ଭେଣ୍ଡରମାନେ କୋଟି କୋଟି ଟଙ୍କାର ସରକାରୀ ଅର୍ଡର ସପ୍ଲାଏ କରି ପ୍ରଚୁର ମୁନାଫା ବାଟମାରଣା କରୁଥିବା ଅଭିଯୋଗ ହୋଇଆସୁଛି ।  ମୁଖ୍ୟତଃ ପାଟଣାଗଡ ବ୍ଲକ୍ର କୁତମୁଣ୍ଡା ଓ ଏହାର ନାମମାତ୍ର ସହଯୋଗୀ ଏସ୍ ଏଚ୍ ଜି ବା  ଶିଳ୍ପକେନ୍ଦ୍ରର ଅନୁମୋଦନ ଯୋଗାଡ କରିଥିବା ତଥାକଥିତ କ୍ଷୁଦ୍ରଶିଳ୍ପ ପ୍ରସ୍ତୁତକର୍ତ୍ତା ଏହି ଭେଣ୍ଡରମାନେ ବୁଲି ବୁଲି ପୂର୍ବର ଶିକ୍ଷାବିଭାଗର ବ୍ଲକ୍ କମିଟିକୁ ହାତକଲା ପରି ଏବେ ଶିଶୁବିକାଶ ବିଭାଗର ଅଧିକାରୀଙ୍କୁ ହାତକରି ଅନେକ ବ୍ଲକ୍ ରେ ଏହା ଯୋଗାଉଛନ୍ତି ।

ଏହି ଚୟନ କମିଟିର ଅଧ୍ୟକ୍ଷ ବିଡିଓ ଓ ସିଡିପିଓମାନେ ରହିଥିବାବେଳେ ଏହି କମିଟିରେ ବିଇଓ , ଆଇପିଓ , ବିଆରସି , ଏବିଇଓ , ବ୍ଲକ୍ ମିଶନଶକ୍ତି ସଂଯୋଜିକା , ଜୀବିକା ନିର୍ବାହ ମିଶନର ପଞ୍ଚାୟତ ସ୍ତରୀୟ ଫେଡେରେସନ୍ ସଦସ୍ୟା ପ୍ରମୁଖ ରହୁଛନ୍ତି । ତେବେ ଏହି ଚୟନକମିଟି ବା ଭେଣ୍ଡରଙ୍କୁ ଅନୁମୋଦନ କରୁଥିବା ଅଧିକାରୀମାନେ  ଏହାର ଗୁଣବତ୍ତା ବା ବଜାରଦର ସହିତ ତାରତମ୍ୟ ପ୍ରତି ଆଖିବୁଜି ଦେଉଥିବା ଅଭିଯୋଗ ପ୍ରକାଶ ପାଇଛି ।  ଜିଲ୍ଲାର ପ୍ରତ୍ୟେକ ବ୍ଲକରେ ଏଇ କୁତମୁଣ୍ଡା ସରକାରୀ ପୋଷାକ ଯୋଗାଣ କରୁଥିବା ବେପାରୀ ପ୍ରତି ଭିଜିଲାନ୍ସର ଦୃଷ୍ଟି ଆକର୍ଷଣ କରାଯାଇଛି ।ଏବେସୁଦ୍ଧା ପୁଇଁତଳା ବ୍ଲକ୍ ର ସାଉନ୍ତପୁର ଆଦି କେତେକ ଅଙ୍ଗନବାଡି କେନ୍ଦ୍ରରେ ସୁଇଟର ବଣ୍ଟନ ହୋଇଯାଇଥିବା ଜଣାଯାଇଛି । ଏ ସମ୍ପର୍କରେ ସମ୍ପୃକ୍ତ ଅଧିକାରୀଙ୍କୁ ଭେଟିବାକୁ ଉଦ୍ୟମ କରାଯାଇଥିଲେ ହେଁ , ସମ୍ଭବ ହୋଇପାରିନାହିଁ । ତେଣୁ ଏ ସମ୍ପକରେ ସମଗ୍ରଜିଲ୍ଲାର ଏକ ବିସ୍ତୃତ ଅନୁସନ୍ଧାନମୂଳକ ବିବରଣୀ ପ୍ରକାଶ ପାଇବ ।