ଅଙ୍ଗନବାଡି କର୍ମୀଙ୍କୁ ଗଛରେ ବାନ୍ଧି ମାଡ ମାମଲା

ପାଲଟା ଅଭିଯୋଗରେ କ’ଣ ଥିଲା  ?

ବାଲେଶ୍ବର  : ଗତ ୧୯ ତାରିଖରେ ବାଲେଶ୍ବର ଜିଲ୍ଲାର ବାଲିଆପାଳ ଥାନା ବଢାଣ ଫାଣ୍ଡି ଅନ୍ତର୍ଗତ କୁଣ୍ଡୁଳି ପଞ୍ଚାୟତର ମହାପଦା ଗ୍ରାମରେ ଘଟିଥିବା ଅଙ୍ଗନବାଡି କର୍ମୀଙ୍କୁ ଗ୍ରାମବାସୀଙ୍କ ଦ୍ୱାରା କଙ୍ଗାରୁକୋର୍ଟରେ ଗଛରେ ବାନ୍ଧି ମାଡ ମରାଯିବା ଭଳି ଏକ ଅଭାବନୀୟ ଘଟଣା ଘଟିଛି । ଏପରିକି ଖବର ପାଇଁ ତାଙ୍କୁ ଘଟଣାସ୍ଥଳକୁ ଉଦ୍ଧାର କରିବାକୁ ଯାଇଥିବା ବାଲିଆପାଳ ସିଡିପିଓ , ବ୍ଲକ୍ ନିଖିଳ ଓଡିଶା ଅଙ୍ଗନବାଡି କର୍ମୀ ସଂଘର ସମ୍ପାଦିକା , ଫାଣ୍ଡି ଅଧିକାରୀ ପହଞ୍ଚି  ଉଦ୍ଧାର କରି ନପାରି ଗ୍ରାମବାସୀଙ୍କ ବିରୋଧରୁ ଫେରି ଆସିଥିବା ଓ ଦିନତମାମ୍ ମନଇଚ୍ଛା ମାଡ ମାରି ଥାନାରେ କୌଣସି ଅଭିଯୋଗ ନ କରିବାକୁ ତାଙ୍କଠାରୁ ଲେଖାଇ ନେଇ ଛାଡିବା ପରି ଚାଞ୍ଚଲ୍ୟକର ଅପରାଧ ଘଟଣା ଘଟିଥିଲା। ଏ ସମ୍ପର୍କରେ ପରେ ପୀଡିତା ଅଙ୍ଗନବାଡି କର୍ମୀଙ୍କ ଅଭିଯୋଗକ୍ରମେ ସିଂଲା ଥାନାରେ ଏକ ମାମଲା ଋଜୁ ହୋଇଥିବା ପ୍ରକାଶ।

ଏ ସମ୍ପର୍କରେ ମଧ୍ୟ ମୁଖ୍ୟମନ୍ତ୍ରୀଙ୍କ ଠାରେ ସଂଘ ପକ୍ଷରୁ ଜିଲ୍ଲାପାଳଙ୍କ ଜରିଆରେ ଅଭିଯୁକ୍ତମାନଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ ଦାବିକରି ଦାବିପତ୍ର ପ୍ରଦାନ କରାଯାଇଛି ଓ ଉପମୁଖ୍ଯ ମନ୍ତ୍ରୀ ତଥା ବିଭାଗୀୟ ମନ୍ତ୍ରୀ ପ୍ରଭାତୀ ପରିଡା ପୀଡିତାଙ୍କ ସହିତ ଫୋନ୍ ରେ କଥାହେଇ ନିଶ୍ଚିତ ନ୍ୟାୟର ପ୍ରତିଶ୍ରୁତି ଦେଇଛନ୍ତି । ଗ୍ରାମବାସୀଙ୍କ ପକ୍ଷରୁ ଉକ୍ତ ଅଙ୍ଗନବାଡି କର୍ମୀଙ୍କ ବିରୋଧରେ ମଧ୍ୟ ଏକ ପାଲଟା ଏତଲା ଦିଆଯାଇଛି ।

ତେବେ ଏଭଳି ଅମାନବୀୟ ନିର୍ଯାତନାର କାରଣ କର୍ମୀଜଣକ ସରକାରଙ୍କ ବହୁଳ ପ୍ରଚାରିତ ମହିଳା ସ୍ବାବଲମ୍ବୀ ଯୋଜନା ‘ ସୁଭଦ୍ରା ‘ କାମ କରିବାରୁ ତାଙ୍କୁ ମନାକରି ଗ୍ରାମବାସୀଙ୍କ ଦ୍ୱାରା ଏପରି ଦଣ୍ଡ ଦିଆଯାଇଛି ବୋଲି ଖବର ପ୍ରକାଶ ପାଇଛି । ଗୁରୁତ୍ୱପୂର୍ଣ୍ଣ ଯେ ଏହି ଆକ୍ରମଣକାରୀ ଅଭିଯୁକ୍ତଙ୍କ ମଧ୍ୟରେ କେତେକ ମହିଳା ଜଡିତ ରହିଥିଲେ । ତାଙ୍କୁ କେନ୍ଦ୍ରରୁ ଘୋଷାଡି ଆଣି ନିସ୍ତୁକ ମାଡମାରିବା ସହ ଦାଣ୍ଡରେ ଦିନତମାମ୍ ବାନ୍ଧି ରଖିଥିଲେ ।

ତେବେ ଏହା କାରଣ କେତେଦୂର ସତ ଓ ସେଇ ଅଙ୍ଗନବାଡି କର୍ମୀଙ୍କ ବିରୋଧରେ ଥାନାରେ ପାଲଟା ଅଭିଯୋଗଟିରେ କ’ଣ ଥିଲା , ସନ୍ଦେହ ସୃଷ୍ଟି ହୋଇଛି ।  ସରକାରଙ୍କର ଏକ ଜନହିତକର ମହିଳା ସଶକ୍ତିକରଣ ଭଳି ସହାୟତା ଯୋଜନାକୁ ଗ୍ରାମବାସୀ ଓ ବିଶେଷତଃ ଗ୍ରାମର ମହିଳାମାନେ କାହିଁକି ଏତେଯୋର୍ ବିରୋଧ କରୁଥିଲେ , ଏହାର ଏକ ଉଚ୍ଚସ୍ତରୀୟ ନିରପେକ୍ଷ ତଦନ୍ତ ଜରୁରୀ ବୋଲି ରାଜ୍ୟବ୍ୟାପି ପ୍ରତିକ୍ରିୟା ସୃଷ୍ଟି ହୋଇଛି । ପ୍ରକୃତରେ ଏହାର କାରଣ ସୁଭଦ୍ରା ଯୋଜନାର କାମକରିବା ନା ଅନ୍ୟକିଛି , ଏହା ଜାଣିବାକୁ ଲୋକଙ୍କ ମଧ୍ୟରେ ପ୍ରବଳ ଉତ୍କଣ୍ଠା ସୃଷ୍ଟି ହୋଇଛି । ସର୍ବୋପରି ଆଜିର ସଭ୍ୟଶିକ୍ଷିତ ଯୁଗରେ ଯଦି ଗୋଟିଏ ଗ୍ରାମରେ ଗ୍ରାମବାସୀଙ୍କ ମଧ୍ୟରେ ନିକୃଷ୍ଟ ଦଳୀୟ ରାଜନୀତି ବା କୌଣସି କାରଣରୁ ଏଭଳି ସରକାର ବିରୋଧୀ ଅମାନବୀୟତା ରହିଛି ଓ ଏହାର ପରିଣାମରେ ଏତାଦୃଶ ନୃଶଂସ ସଂଗଠିତ ଅପରାଧ ଘଟାଯାଇ ପାରୁଛି , ଏଥିପ୍ରତି ସରକାର ତଦନ୍ତ ପୂର୍ବକ ଦୃଷ୍ଟ୍ବାନ୍ତମୂଳକ ପଦକ୍ଷେପ ଜରୁରୀ ବୋଲି ମତବ୍ୟକ୍ତ କରାଯାଇଛି ।