ଏତେଟଙ୍କା ଆଣିଲେ କେଉଁଠୁ ?

ବଲାଙ୍ଗୀର : ଜିଲ୍ଲାର ଦାଦନଚାଲାଣର ଏକ ପ୍ରମୁଖ ପୀଠ ବେଲପଡା ବ୍ଲକ୍ ର ଘାଗୁର୍ଲି ପଞ୍ଚାୟତର ଗ୍ରାମସାଥୀ ଥିବା ଜଣେ ଗରିବ ଶ୍ରେଣୀର କ୍ଷୁଦ୍ରଚାଷୀ ପର୍ଲିମାଲ୍ ରାଜସ୍ବ ସର୍କଲ୍ ଅନ୍ତର୍ଗତ ଘାଗୁର୍ଲି-ଗମ୍ଭାରୀ ରାସ୍ତା ପାର୍ଶ୍ବର ପତ୍ରାଜଙ୍ଗଲ ଭିତରେ ନିଜର କିଛି ଜମି ଥିବା ଦର୍ଶାଇ ଉକ୍ତ ଜଙ୍ଗଲଜମିରେ ରାସ୍ତା ଜବରଦଖଲ କରି ଏକ ବଡ କୁକୁଡା ଫାର୍ମ ସହିତ ପାମ୍ ଅଏଲ୍ ଚାରା ଉତ୍ପାଦନ ଚାଷ କରିଛନ୍ତି । ଏଥିପାଇଁ ତାଙ୍କୁ ‘ମୁଖ୍ଯମନ୍ତ୍ରୀ କୃଷି ଉଦ୍ୟୋଗ ଯୋଜନା’ରେ କୁକୁଡା ଚାଷ ପାଇଁ ୨ କୋଟି ୩୫ ହଜାର ଟଙ୍କାର ଏବଂ ପାମ୍ ଅଏଲ୍ ଚାରା ଉତ୍ପାଦନ ପାଇଁ ବ୍ୟାଙ୍କ ଋଣ ସହାୟତା ମିଳିଛି । ତେବେ ଏହା ଲୋକଙ୍କର ସନ୍ଦେହ ସୃଷ୍ଟି କରିଛି ।

ଜନସାଧାରଣଙ୍କ ଅଭିଯୋଗରୁ ପ୍ରକାଶ ଯେ , ଏହି ବ୍ଲକର ଗ୍ରାମସୀଥୀମାନେ ମନରେଗାର ସୋକ୍ ପିଟ୍ ଟଙ୍କା ହଡପ କରି ମାଲାମାଲ୍ ହୋଇଯାଇଥିବା ପରିପ୍ରେକ୍ଷୀରେ ଉକ୍ତ ଗ୍ରାମସାଥୀ ଜଣକ ମଧ୍ଯ ସରପଞ୍ଚ ଓ ବ୍ଲକ୍ ଅଧିକାରୀଙ୍କୁ ହାତ କରି ବଙ୍ଗାଳୀ ଠିକାଦାର ଲଗାଇ ପ୍ରତି ଗ୍ରାମର ହିତାଧିକାରୀଙ୍କ ବାସନମଜା ଜାଗାରେ ସୋକ୍ ପିଟ୍ ପିଛା ସାଢେ ୭ ହଜାରରୁ ହଜାର ହଜାର ଟଙ୍କାର ବାଟମାରଣା କରିଆସିଥିଲେ । ଏହି ସମ୍ବଳରେ ଉଦ୍ଦେଶ୍ଯମୂଳକ ଭାବେ ପତ୍ନୀଙ୍କ ନାମରେ କିଛି ଜଙ୍ଗଲ ସଂଲଗ୍ନ ଜମି କିଣି ରାଜନେତା ଓ ବ୍ୟାଙ୍କ ଏବଂ ବିଭିନ୍ନ ଜଙ୍ଗଲ, ଉଦ୍ୟାନ ବିଭାଗ, ପଶୁପାଳନ ବିଭାଗ ଓ ପାମ୍ ତେଲ ଚାଷ କରାଉଥିବା କମ୍ପାନୀର ଅଧିକାରୀଙ୍କୁ ଧରାଧରି କରି ଏଭଳି କୋଟି କୋଟି ଟଙ୍କାର ସମନ୍ଵିତ ଫାର୍ମ କରିବାରେ ସଫଳ ହୋଇଥିବା କୁହାଯାଉଛି । ଏ ସମ୍ପର୍କରେ ଉକ୍ତ ଫାର୍ମ ଓ ଉକ୍ତ ଗ୍ରାମସାଥୀ ବନାମ ଚାଷୀ ନବୀନ ଚଣ୍ଡୀଙ୍କ ଘାଗୁର୍ଲି ସ୍ଥିତ ଘରକୁ ଯାଇ ପଚାରିଥିବା ସତ୍ତ୍ବେ , ସେ ଫୋନ୍ ରେ ଅଳ୍ପ କଥା ହୋଇ ଏଭଳି ଅଭିଯୋଗକୁ ଅସ୍ୱୀକାର କରିଥିବା ସହ ଧରାଛୁଆଁ ଦେଇ ନ ଥିବାରୁ ଏଥିରେ କିଛି ହେରଫେର ରହିଥିବାର ସନ୍ଦେହ ହେଉଛି । ଏଣୁ ଏହି ବେଲପଡା ବ୍ଲକର ପଞ୍ଚାୟତ ଗୁଡିକରେ ମନରେଗାର ଉକ୍ତ ସୋକ୍ ପିଟ୍ ଦୁର୍ନୀତି ଓ ଏତାଦୃଶ ଉଠିଥିବା ଜଙ୍ଗଲ ଜମି ଜବରଦଖଲ ବା ଅନୁଚିତ ବ୍ୟାଙ୍କ୍ ଋଣ ଅନୁଗ୍ରହ ଇତ୍ୟାଦିର ଏକ ଭିଜିଲାନ୍ସ ତଦନ୍ତ କରାଯିବାକୁ ସ୍ଥାନୀୟ ଲୋକେ ସରକାରଙ୍କ ଠାରେ ଦାବି କରନ୍ତି ।